മധുര: തിരുപ്രംകുണ്ഡ്രം ശ്രീസുബഹ്മണ്യ സ്വാമി ക്ഷേത്രത്തില്‍ കോടതി ഉത്തരവ് പാടെ ലംഘിച്ച അതേ രീതിയില്‍ മറ്റു ജില്ലകളിലെ ക്ഷേത്രങ്ങളുമായി ബന്ധപ്പെട്ടും കോടതി ഉത്തരവുകള്‍ ലംഘിച്ചിട്ടുണ്ടെന്ന് മദ്രാസ് ഹൈക്കോടതിയുടെ മധുര ബെഞ്ച്.
ഈ ലംഘനങ്ങള്‍ക്ക് എല്ലാം ഒരു പ്രത്യേക രീതിയുണ്ടായിരുന്നു. കോടതി ഉത്തരവുകള്‍ നഗ്നമായി ലംഘിക്കാന്‍ ജില്ലാ തലത്തിലുള്ള ഉദ്യോഗസ്ഥര്‍ ഒരിക്കലും ധൈര്യപ്പെടില്ല. നിയമം പാലിക്കുകയാണ് അവരുടെ കടമയെന്ന് കോടതി അവരെ ഓര്‍മിപ്പിക്കുന്നു. ആരെങ്കിലും വാക്കാല്‍ നല്‍കുന്ന ഉത്തരവുകളല്ല അവര്‍ പാലിക്കേണ്ടത്. ഇക്കാര്യത്തില്‍ സംസ്ഥാനത്തെ ഏറ്റവും ഉയര്‍ന്ന ഉദ്യോഗസ്ഥര്‍ തന്നെ ഉത്തരം നല്‍കണം. ജില്ലാതല ഉദ്യോഗസ്ഥര്‍ക്ക് എന്തെങ്കിലും നിര്‍ദേശങ്ങളോ സര്‍ക്കുലറോ നല്‍കാന്‍ ഉദ്ദേശ്യമുണ്ടോയെന്ന് അവര്‍ നേരിട്ട് പറയണം.
കൈകള്‍ ഉയര്‍ത്തി, പിതാവേ അവര്‍ക്ക് മാപ്പു നല്‍കണം, അവര്‍ ചെയ്യുന്നത് എന്താണെന്ന് അവര്‍ തന്നെ അറിയുന്നില്ല എന്ന് പറയാനല്ല ഞാന്‍ ഇവിടിരിക്കുന്നത്. ജസ്റ്റിസ് സ്വാമിനാഥന്‍ വ്യക്തമാക്കി. രണ്ടു മതവിഭാഗങ്ങള്‍ തമ്മില്‍ സംഘര്‍ഷമുണ്ടായ മറ്റ് രണ്ടു സംഭവങ്ങളിലും ഇതേപോലെ കോടതി ഉത്തരവുകള്‍ ലംഘിച്ചിരുന്നു, അദ്ദേഹം ചൂണ്ടിക്കാട്ടി. ക്രിസ്ത്യന്‍ വിഭാഗത്തില്‍പ്പെട്ട വില്‍സണ്‍ എന്നയാള്‍ നല്‍കിയ പരാതിയുടെ പേരില്‍, കന്യാകുമാരി മൈലാടുംപാറയില്‍ നിന്ന് മുരുകന്റെ പ്രതിമ നിയമവിരുദ്ധമായി നീക്കിയിരുന്നു. ഇത് പുനഃസ്ഥാപിക്കാനുള്ള ഉത്തരവ് ലംഘിച്ചു. ഈ ഉത്തരവ് പാലിക്കാന്‍ ഭരണകൂടം വിസമ്മതിച്ചു.
ഡിണ്ടിഗല്‍ കാളിയമ്മന്‍ കോവിലിനു സമീപം ക്രിസ്ത്യന്‍ ഭൂരിപക്ഷമുള്ള പെരുമാള്‍ കോവില്‍പട്ടിയില്‍ മണ്ടു കോവില്‍ എന്ന ക്ഷേത്രത്തില്‍, കാര്‍ത്തിക ദീപം തെളിയിക്കുന്നതിനെ ക്രിസ്ത്യാനികള്‍ എതിര്‍ത്തു. ഫെബ്രുവരിയില്‍ ഇതിനെതിരെ നല്‍കിയ ഹര്‍ജിയില്‍ കോടതി ഇടപെട്ട് ഉത്തരവു നല്‍കി. എന്നാല്‍ കളക്ടര്‍ നിരോധനാജ്ഞ പുറപ്പെടുവിച്ചു. അതുവഴി കോടതി ഉത്തരവ് ലംഘിക്കാന്‍ പോലീസിന് വഴിയൊരുക്കി.
ഇതേ തരത്തിലാണ് തിരുപ്രംകുണ്ഡ്രത്തും നടന്നത്. തിരുപ്രംകുണ്ഡ്രം കുന്നില്‍ അരുള്‍ മിഗു സുബ്രഹ്മണ്യ സ്വാമി ക്ഷേത്രവും സിക്കന്ദര്‍ ബാദുഷാ ദര്‍ഗയുമാണ് ഉള്ളത്. ഇവിടെ ക്ഷേത്രത്തിലെ ദീപസ്തംഭത്തില്‍ കാര്‍ത്തിക ദീപം തെളിയിക്കാന്‍ ഡിസംബര്‍ ഒന്നിന് നിര്‍ദേശിച്ചു. ഇവിടെ ദര്‍ഗയുടെ അവകാശങ്ങള്‍ ഒന്നും ലംഘിക്കപ്പെടുന്നുമില്ല. ഉത്തരവ് ലംഘിച്ചതായി കണ്ട് ഡിസം. 3ന് സിഐഎസ്എഫ് സംരക്ഷണയില്‍ ദീപം തെളിയിക്കാന്‍ കോടതി ഭക്തരോട് നിര്‍ദേശിച്ചു. എന്നാല്‍ ഭക്തര്‍ക്ക് സംരക്ഷണം നല്‍കുന്നതില്‍ നിന്ന്, പോലീസ് കമ്മിഷണര്‍ തടയുകയാണ് ചെയ്തതെന്നാണ് സിഐഎസ്എഫ് അധികൃതര്‍ വ്യക്തമാക്കിയത്. മജിസ്‌ട്രേറ്റിന്റെ നിരോധനാജ്ഞ ഉണ്ടെന്നു പറഞ്ഞായിരുന്നു ഇത്. ഈ വാദം കോടതി തള്ളി, എന്തെന്നാല്‍ നിരോധനാജ്ഞ കോടതി റദ്ദാക്കിയിരുന്നു. പോലീസ് കമ്മിഷണറുടെ സാന്നിധ്യത്തിലായിരുന്നു ആ ഉത്തരവ് കോടതി റദ്ദാക്കിയത്. സുപ്രീംകോടതിയില്‍ അപ്പീല്‍ നല്‍കിയതിനാല്‍ വിഷയത്തില്‍ കൂടുതല്‍ ഇടപെടരുതെന്നും സര്‍ക്കാര്‍ അഭിഭാഷകന്‍ ഹൈക്കോടതിയോട് പറഞ്ഞു. ഇതും കോടതി തള്ളി. അതോടെ കാര്‍ത്തിക ദീപം തെളിയിക്കാനുള്ള സമയം കഴിഞ്ഞെന്നായി സര്‍ക്കാര്‍ അഭിഭാഷകന്റെ വാദം. ജസ്റ്റിസ് ചൂണ്ടിക്കാട്ടി.
ഡിസംബര്‍ മൂന്നിന് ഡിവിഷന്‍ ബെഞ്ച് തന്നെ സിംഗിള്‍ ബെഞ്ച് ഉത്തരവ് ശരിവെച്ചിരുന്നു. സര്‍ക്കാരിന് അനുകൂലമായ ഒരു നടപടിയും ഡിവിഷന്‍ ബെഞ്ച് കൈക്കൊണ്ടിട്ടുമില്ല. അപ്പീല്‍ നല്‍കിയെങ്കിലും സുപ്രീംകോടതിയും ഈ വിഷയത്തില്‍ ഇതുവരെ ഇടപെട്ടിട്ടുമില്ല. ഈ സാഹചര്യത്തില്‍ കാര്‍ത്തിക ദീപം തെളിയിക്കാന്‍ ഈ കോടതി ഭക്തര്‍ക്ക് നല്‍കിയ നിര്‍ദേശം അതേപോലെ നിലനില്‍ക്കുകയാണ്. ജസ്റ്റിസ് സ്വാമിനാഥന്‍ വ്യക്തമാക്കി.
