കട്ടക്ക്: 16 വയസ്സില് താഴെയുള്ളവര്ക്കായുള്ള വിജയ് മര്ച്ചന്റ് ട്രോഫിയില് കേരളത്തിന് മികച്ച തുടക്കം. ടൂര്ണ്ണമെന്റിലെ ആദ്യ മത്സരത്തിന്റെ ആദ്യ ദിവസം തന്നെ മണിപ്പൂരിനെതിരെ കേരളം ഒന്നാം ഇന്നിങ്സ് ലീഡ് നേടി. ആദ്യം ബാറ്റ് ചെയ്ത മണിപ്പൂര്, ഒന്നാം ഇന്നിങ്സില് വെറും 64 റണ്സിന് ഓള് ഔട്ടായി. മറുപടി ബാറ്റിങ്ങിന് ഇറങ്ങിയ കേരളം ആദ്യ ദിവസം കളി നിര്ത്തുമ്പോള് ഒരു വിക്കറ്റ് നഷ്ടത്തില് 145 റണ്സെന്ന നിലയിലാണ്. കേരളത്തിനിപ്പോള് 81 റണ്സിന്റെ ലീഡുണ്ട്.
ടോസ് നേടിയ കേരളം മണിപ്പൂരിനെ ആദ്യം ബാറ്റ് ചെയ്യാനയക്കുകയായിരുന്നു. തുടക്കം മുതല് തകര്ച്ച നേരിട്ട മണിപ്പൂര് ബാറ്റിങ് നിരയ്ക്ക് ഒരു ഘട്ടത്തിലും കേരളത്തിന്റെ ബൗളിങ് നിരയ്ക്ക് മുന്നില് പിടിച്ചു നില്ക്കാനായില്ല. 14 റണ്സ് വീതം നേടിയ സുനെദ്, ദിസ്തരാജ് എന്നിവര് മാത്രമാണ് മണിപ്പൂര് ബാറ്റിങ് നിരയില് രണ്ടക്കം കടന്നത്. കേരളത്തിന് വേണ്ടി എസ് വി ആദിത്യന് നാല് വിക്കറ്റ് വീഴ്ത്തി. മുഹമ്മദ് റെയ്ഹാന്, മുകുന്ദ് എന് മേനോന്, നവനീത് കെ എസ് എന്നിവര് രണ്ട് വിക്കറ്റ് വീതവും നേടി.
മറുപടി ബാറ്റിങ്ങിന് ഇറങ്ങിയ കേരളത്തിന് വേണ്ടി വിശാല് ജോര്ജ്ജും അദിതീശ്വറും ചേര്ന്നാണ് ഇന്നിങ്സ് തുറന്നത്. അദിതീശ്വര് 16 റണ്സെടുത്ത് പുറത്തായി. എന്നാല് വിശാല് ജോര്ജും ക്യാപ്റ്റന് ഇഷാന് എം രാജും ചേര്ന്ന് കേരളത്തെ ശക്തമായ നിലയിലെത്തിച്ചു. കളി നിര്ത്തുമ്പോള് ഒരു വിക്കറ്റിന് 145 റണ്സെന്ന നിലയിലാണ് കേരളം. വിശാല് 72 റണ്സും ഇഷാന് 52 റണ്സും നേടി ക്രീസിലുണ്ട്.
