തിരുവനന്തപുരം: അഴിമതിരഹിത വികസിത തിരുവനന്തപുരമെന്ന ലക്ഷ്യത്തിനുവേണ്ടി ബിജെപി സ്ഥാനാര്‍ത്ഥികളെ വിജയിപ്പിക്കണമെന്ന് അഭ്യര്‍ത്ഥിച്ച് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്‍ നടത്തിയ റോഡ്‌ഷോ വലിയ ജനപങ്കാളിത്തം കൊണ്ടും വാഹന ബാഹുല്യം കൊണ്ടും പൊതുജനശ്രദ്ധ പിടിച്ചുപറ്റി.
കവടിയാര്‍ സ്വാമി വിവേകാനന്ദ ഉദ്യാനത്തില്‍ നിന്ന് വൈകിട്ട് 5ന് ആരംഭിച്ച റോഡ്‌ഷോയില്‍ സംസ്ഥാന അധ്യക്ഷന് രാജീവ് ചന്ദ്രശേഖറിനൊപ്പം സിറ്റി ജില്ല അധ്യക്ഷന് കരമന ജയന്‍, സ്ഥാനാര്‍ത്ഥികളായ മധുസൂദനന്‍ (കവടിയാര്‍), അനില്‍കുമാര്‍ (പേരൂര്‍ക്കട), മണികണ്ഠന്‍ (കിണവൂര്‍), വിശ്വേശ്വരന്‍ (പാതിരപള്ളി), കുമാരി ജയന്തി (അമ്പലമുക്ക്), രാധിക റാണി (ഗൗരീശപട്ടം), ഷീജ (കുടപ്പനക്കുന്ന്), മിനിമോള്‍ (കുറവന്‍കോണം), അജിത് (മുട്ടട), വിജയകുമാര്‍ (തുരുത്തുംമൂല) എന്നിവര്‍ പങ്കെടുത്തു.
കവടിയാര്‍ മുതല്‍ പേരൂര്‍ക്കട വരെ റോഡിനിരുവശവും നഗരവാസികളും അല്ലാത്തവരുമായ പൊതുജനം രാജീവ് ചന്ദ്രശേഖറിന് അഭിവാദ്യമര്‍പ്പിച്ചു. സര്‍ക്കാര്‍ ഓഫീസ്, സ്വകാര്യസ്ഥാപനങ്ങള്‍ എന്നിവിടങ്ങളില്‍ നിന്നും വീടുകളിലേക്ക് പോകാന്‍ ബസ് കാത്തുനിന്ന ജനം ആവേശത്തോടെ ബിജെപി അധ്യക്ഷന് അഭിവാദ്യമര്‍പ്പിച്ചു. വൈകിട്ട് 6.30 ഓടെ പേരൂര്‍ക്കടയില്‍ റോഡ്‌ഷോ സമാപിച്ചു. തുടര്‍ന്നു നടന്ന പട്ടം മണ്ഡലത്തിലെ സ്ഥാനാര്‍ത്ഥി സംഗമം അദ്ദേഹം ഉദ്ഘാടനം ചെയ്തു.
അഴിമതിരഹിത ഭരണമാണ് ഞങ്ങള്‍ നല്‍കുന്ന ഉറപ്പ്. ഞങ്ങള്‍ ഭരിച്ചാല്‍ കോര്‍പറേഷന്‍ ഓഫീസില്‍ പോയി കൈക്കൂലി കൊടുത്ത് കാര്യങ്ങള്‍ ചെയ്യിപ്പിക്കേണ്ട അവസ്ഥ ഉണ്ടാവില്ല. ഓരോ പൗരന്റെയും വീട്ടുപടിക്കല്‍ ഭരണം എത്തും. അത് ഞങ്ങളുടെ ഉറപ്പാണ്. നരേന്ദ്ര മോദി ഭാരതത്തിന് കാണിച്ചുകൊടുത്ത ഭരണശൈലി ഇവിടെ കൊണ്ടുവരുമെന്നും രാജീവ് ചന്ദ്രശേഖര്‍ പറഞ്ഞു.
