കൊച്ചി: ശബരിമല സ്വര്‍ണക്കൊള്ള സംബന്ധിച്ച അന്വേഷണം പൂര്‍ത്തിയാക്കാന്‍ പ്രത്യേക അന്വേഷണ സംഘത്തിന് (എസ്‌ഐടി) ഹൈക്കോടതി ആറാഴ്ച കൂടി അനുവദിച്ചു.
ശ്രീകോവില്‍ കട്ടിളപ്പാളിയില്‍ നിന്ന് സ്വര്‍ണം മോഷ്ടിക്കപ്പെട്ടെന്ന് കണ്ടെത്തി, കോടതി സ്വമേധയാ ആരംഭിച്ച കേസ് പരിഗണിക്കുന്നതിനിടെയാണ് ജസ്റ്റിസുമാരായ വി. രാജ വിജയരാഘവന്‍, കെ.വി. ജയകുമാര്‍ എന്നിവരടങ്ങിയ ബെഞ്ചിന്റെ ഉത്തരവ്. പോലീസ് സൂപ്രണ്ട് എസ്. ശശിധരന്റെ നേതൃത്വത്തില്‍ എസ്‌ഐടി രൂപീകരിച്ച ബെഞ്ച് ആറാഴ്ചയ്‌ക്കുള്ളില്‍ അന്വേഷണം പൂര്‍ത്തിയാക്കാന്‍ നിര്‍ദേശിച്ചിരുന്നു. എന്നാല്‍, ആരോപണങ്ങളുടെ വ്യാപ്തിയും ഗൗരവവും ചൂണ്ടിക്കാട്ടി എസ്‌ഐടി കൂടുതല്‍ സമയം ആവശ്യപ്പെടുകയായിരുന്നു, കോടതി അതനുവദിച്ചു.
എസ്‌ഐടി രജിസ്റ്റര്‍ ചെയ്ത രണ്ട് കേസുകളുമായി ബന്ധപ്പെട്ട് അന്വേഷണ ഉദ്യോഗസ്ഥന്‍ ശശിധരന്‍ ബുധനാഴ്ച നേരിട്ട് ബെഞ്ചിന് മുന്നില്‍ ഹാജരായി പുരോഗതി റിപ്പോര്‍ട്ടുകള്‍ സമര്‍പ്പിച്ചു. റിപ്പോര്‍ട്ടുകളും അന്വേഷണ രീതിയും കോടതി പരിശോധിച്ചു. ദ്വാരപാലക ശില്‍പങ്ങളുടെയും മറ്റ് വിലപിടിപ്പുള്ള വസ്തുക്കളുടെയും കവറുകളില്‍ നിന്ന് ശേഖരിച്ച സാമ്പിളുകള്‍ ശാസ്ത്രീയ പരിശോധനയ്‌ക്ക് അയച്ചിട്ടുണ്ടെങ്കിലും ഫലങ്ങള്‍ ഇപ്പോഴും കാത്തിരിക്കുകയാണെന്ന് കോടതി ചൂണ്ടിക്കാട്ടി. ഫോറന്‍സിക് റിപ്പോര്‍ട്ട് ഒരാഴ്ചയ്‌ക്കുള്ളില്‍ പ്രതീക്ഷിക്കുന്നതായി അന്വേഷണ ഉദ്യോഗസ്ഥന്‍ കോടതിയെ അറിയിച്ചു.
ശ്രീകോവിലിന്റെ പ്രധാന കവാടവുമായി ബന്ധപ്പെട്ട 2018-2019ലെ ഇടപാടുകളെക്കുറിച്ചും ദ്വാരപാലക ശില്‍പങ്ങള്‍ സ്വര്‍ണം പൂശാന്‍ ചെന്നൈക്ക് കൊണ്ടുപോയതുമായി ബന്ധപ്പെട്ട് 2014നും 2025നുമിടെയുള്ള ഇടപാടുകളുടെ പരമ്പരയെക്കുറിച്ചും അന്വേഷണം ഇപ്പോഴും പ്രാരംഭഘട്ടത്തിലാണെന്നും കോടതി പറഞ്ഞു. അതനുസരിച്ച്, അന്വേഷണം പൂര്‍ത്തിയാക്കാന്‍ എസ്‌ഐടിക്ക് ആറാഴ്ച കൂടി അനുവദിച്ച കോടതി, ഹര്‍ജി 2026 ജനുവരി അഞ്ചിലേക്ക് മാറ്റി.
