ചണ്ഡീഗഢ്: ഗുണ്ടാനേതാവ് ലോറന്സ് ബിഷ്ണോയിയുടെ അടുത്ത അനുയായി വെടിയേറ്റ് മരിച്ചു. പാരി എന്ന് വിളിപ്പേരുള്ള ഇന്ദര്പ്രീത് സിങ്ങാണ് (35) കൊല്ലപ്പെട്ടത്. തിങ്കളാഴ്ച രാത്രിയില് ചണ്ഡീഗഢ് ടിംബര് മാര്ക്കറ്റ് സെക്ടര് 26ല് കാറിലെത്തിയ അക്രമികള് പാരിയ്ക്ക് നേരെ വെടിയുതിര്ക്കുകയായിരുന്നു. നിരവധി ക്രിമിനല് കേസുകളില് പ്രതിയാണ് ഇയാള്.
ടിംബര് മാര്ക്കറ്റിന് സമീപത്തെ ക്ലബില് നിന്ന് എസ്യുവിയില് പുറത്തേക്കിറങ്ങുന്നതിനിടെയാണ് വെടിവെപ്പുണ്ടായത്. 10 തവണയാണ് അക്രമികള് ഇയാള്ക്കു നേരെ വെടിയുതിര്ത്തത്. ഈ സമയം പാരിക്കൊപ്പം മറ്റൊരാള് കൂടിയുണ്ടായിരുന്നു, ആരെന്ന് വ്യക്തമല്ല, അന്വേഷണം ആരംഭിച്ചിട്ടുണ്ട്. പാരിയും ലോറന്സ് ബിഷ്ണോയിയും കോളജില് സുഹൃത്തുക്കളായിരുന്നു. വിദ്യാര്ത്ഥി സംഘടനയായ എസ്ഒപിയുമായും ഇവര്ക്ക് ബന്ധമുണ്ടായിരുന്നു. ലോറന്സ് ബിഷ്ണോയി ജയിലിലായതോടെ പാരി സ്വന്തമായി ഗുണ്ടാസംഘമുണ്ടാക്കി. ഇതാണ് കൊലയില് കലാശിച്ചതെന്നാണ് പ്രാഥമിക നിഗമനം.
അതേസമയം ലോറന്സ് ബിഷ്ണോയി സംഘം സമൂഹമാധ്യമത്തിലൂടെ കൊലപാതകത്തിന്റെ ഉത്തരവാദിത്തം ഏറ്റെടുത്തു. പാരി വഞ്ചിച്ചെന്നും ഗോള്ഡി, രോഹിത് എന്നീ ബിഷ്ണോയി സംഘത്തിന്റെ പേരുകള് ഉപയോഗിച്ച് ക്ലബ്ബുകളില് നിന്ന് പണം തട്ടിയെന്നുമാണ് പോസ്റ്റില് ആരോപിക്കുന്നത്.
