കൊച്ചി: വിദ്യാഭ്യാസവും യോഗ്യതയും ഉള്ള എല്ലാവര്‍ക്കും ഉയര്‍ന്നുവരാന്‍ കഴിയുന്ന അനുകൂല സാഹചര്യമല്ല നിലനില്‍ക്കുന്നതെന്നും അതിന് മാറ്റം വരാന്‍ ഏകീകൃത സിവില്‍ കോഡ് നടപ്പാക്കണമെന്നും പാചക രംഗത്ത് വ്യക്തിമുദ്ര പതിപ്പിച്ച പഴയിടം മോഹനന്‍ നമ്പൂതിരി.സംവരണം വലിയ പ്രശ്നമാണ്.
ആ അര്‍ത്ഥത്തില്‍ ഏകീകൃത സിവില്‍ കോഡ് ആവശ്യമാണെന്ന് പഴയിടം മോഹനന്‍ നമ്പൂതിരി പറഞ്ഞു. ഒരു മാധ്യമത്തിന്റെ പരിപാടിയിലാണ് അദ്ദേഹം ഇങ്ങനെ പറഞ്ഞത്.ഇതിനായി ഒരു ഉദാഹരണവും അദ്ദേഹം പറഞ്ഞു.” കൊടുംവെയിലില്‍ ആളുകള്‍ ക്യൂവില്‍ നില്‍ക്കുന്നത് സങ്കല്‍പ്പിക്കുക. ചിലരെ ക്ഷണിക്കുകയും നാരങ്ങാനീര് നല്‍കുകയും ചെയ്യുന്നു.മറ്റുള്ളവരെ ഒഴിവാക്കുന്നു.’
തന്റെ ചെറുപ്പകാലത്ത് അങ്ങനെയായിരുന്നു സാഹചര്യം. അവസരങ്ങള്‍ കുറവായിരുന്നു. താന്‍ അത്ര മികവുളള ആളായിരുന്നില്ല.വായനയിലൂടെയും യാത്രയിലൂടെയുമാണ് തന്റെ ജീവിതം വികസിച്ചത്. അന്ന്, ഒരു ബ്രാഹ്മണനായതിന്റെ പേരില്‍ അപകര്‍ഷതാബോധം പോലും തോന്നിയിരുന്നു. ഇപ്പോള്‍, പലയിടത്തും പൂണൂലിട്ട് മന്ത്രങ്ങള്‍ പഠിപ്പിച്ച് ആളുകളെ ബ്രാഹ്മണരാക്കാനുള്ള ശ്രമങ്ങള്‍ നടക്കുന്നു. അന്ന് അത് നേരെ തിരിച്ചായിരുന്നു.
അന്ന് സംവരണ വിഭാഗത്തില്‍ പെടാനുള്ള സാധ്യതയെക്കുറിച്ച് പോലും ചിന്തിച്ചിട്ടുണ്ടെന്ന് പഴയിടം പറഞ്ഞു.ഇന്ത്യ പോലുള്ള ഒരു രാജ്യത്ത് ഇതൊന്നും പാടില്ല. മറ്റ് രാജ്യങ്ങളില്‍ യാത്ര ചെയ്തപ്പോള്‍ അവിടെ സംവരണം ഇല്ലെന്ന് മനസിലായി. മെറിറ്റിന്റെ അടിസ്ഥാനത്തിലാണ് ആളുകള്‍ക്ക് തൊഴില്‍ ലഭിക്കുന്നത്. കഴിവായിരിക്കണം മാനദണ്ഡമെന്നും പഴയിടം മോഹനന്‍ നമ്പൂതിരി പറഞ്ഞു.
