തിരുവനന്തപുരം: സൂപ്പര് ലീഗ് കേരളയില് ഇന്ന് മലപ്പുറം എഫ്സിയെ തോല്പ്പിച്ചാല് തിരുവനന്തപുരം കൊമ്പന്സ് സെമിയിലേക്ക് മുന്നേറും. മറിച്ച് സമനിലയോ തോല്വിയോ ആയാല് അവസാന മത്സരം വരെ അവര്ക്ക് കാത്തിരിക്കേണ്ടി വരും. എന്നാല് മലപ്പുറം എഫ്സിക്ക് സെമി സാധ്യത നിലനിര്ത്തണമെങ്കില് ഇന്ന് വിജയം അനിവാര്യമാണ്. 7.30ന് തിരുവനന്തപുരം ചന്ദ്രശേഖരന്നായര് സ്റ്റേഡിയത്തിലാണ് മത്സരം.
ഇന്ന് കൊമ്പന്സ് ജയിച്ചാല് സെമിയിലെത്തുന്ന മൂന്നാമത്തെ ടീമാകും അവര്. കാലിക്കറ്റ് എഫ്സിയും തൃശൂര് മാജിക്കും ഇതിനകം സെമിഫൈനല് ഉറപ്പിച്ചു കഴിഞ്ഞു.
അങ്ങനെയായാല് സെമിയിലെ നാലാമത്തെ ടീമിനെ അറിയാന് ഡിസംബര് നാലിന് മഞ്ചേരി പയ്യനാട് സ്റ്റേഡിയത്തില് നടക്കുന്ന മലപ്പുറം എഫ്സി- ഫോഴ്സ കൊച്ചി മത്സരം കഴിയുന്നതുവരെ കാത്തിരിക്കണം.
നിലവില് എട്ട് മത്സരങ്ങളില് നിന്ന് 11 പോയിന്റോടെ പട്ടികയില് മൂന്നാം സ്ഥാനത്താണ് കൊമ്പന്സുള്ളത്. മലപ്പുറമാണെങ്കില് എട്ട് മത്സരങ്ങളില് 10 പോയിന്റോടെ തൊട്ട് പിന്നില് നാലാം സ്ഥാനത്താണ്.
കൊമ്പന്സും മലപ്പുറവും ഏറ്റുമുട്ടിയപ്പോഴെല്ലാം സമനിലയാണ് അവസാനിച്ചത്. ആദ്യ സീസണില് ഇരുവരും ഏറ്റുമുട്ടിയ രണ്ട് മത്സരങ്ങളും സമാസമം പിരിഞ്ഞു. തിരുവനന്തപുരത്ത് നടന്ന കളി 1-1, പയ്യനാട് നടന്ന കളി 2-2. ഇത്തവണ മലപുപറത്ത് നടന്ന ആദ്യ പാദം 1-1നാണ് അവസാനിച്ചത്.
തൃശൂര് മാജിക് എഫ്സിയെ അവരുടെ തട്ടകത്തില് സമനിലയില് പിടിച്ചതിന്റെ ആത്മവിശ്വാസവുമായാണ് കൊമ്പന്സ് ഇന്ന് സ്വന്തം തട്ടകത്തില് നിര്ണായക മത്സരത്തിനിറങ്ങുന്നത്. അതേ സമയം മലപ്പുറം എഫ്സി കോഴിക്കോട് കോര്പ്പറേഷന് സ്റ്റേറ്റേഡിയത്തില് നടന്ന കളിയില് ഒന്നിനെതിരെ മൂന്ന് ഗോളുകള്ക്ക് പരാജയപ്പെട്ടതിന്റെ വേദനയുമായാണ് ഇന്ന് അതി നിര്ണായകമായ പോരാട്ടത്തിനിറങ്ങുന്നത്.
