ന്യൂദല്‍ഹി: ഇന്ത്യയിലെ ബാങ്കുകള്‍ അപകടത്തിലാണെന്ന് ധനമന്ത്രിക്ക് കത്തയച്ച് സിപിഎം എംപി ജോണ്‍ ബ്രിട്ടാസ്. വിദേശധനകാര്യസ്ഥാപനങ്ങളുടെ നിയന്ത്രണത്തില്‍ നിന്ന് ഇന്ത്യന്‍ ബാങ്കുകളെ സംരക്ഷിക്കാന്‍ ഇടപെടണമെന്ന് ആവശ്യപ്പെട്ട് ധനമന്ത്രി നിര്‍മ്മല സീതാരാമന് കത്തയച്ചിരിക്കുകയാണ് ജോണ്‍ ബ്രിട്ടാസ്.
പക്ഷെ സിപിഎം നിയന്ത്രണത്തില്‍പ്പെട്ട കരുവന്നൂര്‍ ബാങ്ക് കോടികള്‍ സാധാരണക്കാരെ തട്ടിച്ചപ്പോള്‍ ഒരക്ഷരം ഉരിയാടാത്ത ആളാണ് ഈ ബ്രിട്ടാസ് എന്നോര്‍ക്കണം. സിപിഎമ്മിന്റെ തൃശൂര്‍ ജില്ലാഘടകത്തിന്റെ നേരിട്ടുള്ള നിയന്ത്രണത്തിന് കീഴിലായിരുന്നു കരുവന്നൂര്‍ ബാങ്ക്. അത് സിപിഎമ്മിന്റെ ഒരു തീരാകളങ്കമായി മാറി. ഇപ്പോഴും അവിടുത്തെ സാമ്പത്തിക ദുസ്ഥിതിക്ക് പരിഹാരം കാണാന്‍ കഴിഞ്ഞില്ല.
ലോകത്തിലെ ശക്തമായ 100 ബാങ്കുകളുടെ ലിസ്റ്റെടുത്താല്‍ അതില്‍ ഇന്ത്യയില്‍ നിന്നുള്ള രണ്ട് ബാങ്കുകള്‍ മാത്രമേയുള്ളൂ എന്ന ദയനീയാവസ്ഥയില്‍ നിന്നും ഇന്ത്യയുടെ ബാങ്കിംഗ് രംഗത്തെ കരകയറ്റാനുള്ള കഠിനപ്രയത്നത്തിലാണ് മോദി സര്‍ക്കാര്‍. ചൈനയിലെ ബാങ്കുകളാണ് ഇപ്പോള്‍ ആഗോളബാങ്കിംഗ് പട്ടികയില്‍ മുന്‍നിരയില്‍ നില്‍ക്കുന്നത്.
ഇപ്പോള്‍ ലോകത്തിലെ നാലാമത്തെ സാമ്പത്തിക ശക്തിയായ ഇന്ത്യ ലോകത്തിലെ മൂന്നാമത്തെ സാമ്പത്തിക ശക്തിയാകാനുള്ള കുതിപ്പിലാണ്. അമേരിക്കയ്‌ക്കും ചൈനയ്‌ക്കും പിന്നില്‍ മൂന്നാം സാമ്പത്തിക ശക്തിയാകുമ്പോള്‍ അതിന് ഒത്ത വിധം ആഗോളതലത്തില്‍ സേവനം നല്‍കാന്‍ കഴിയുന്ന വലിയ ബാങ്കുകളും ധനകാര്യസ്ഥാപനങ്ങളും ഇന്ത്യയ്‌ക്ക് ആവശ്യമാണ്. അതിന്റെ ഭാഗമായി ബാങ്കിംഗ് രംഗത്ത് പുതിയ അഴിച്ചുപണികള്‍ അതിവേഗം നടപ്പാക്കുകയാണ് ഇന്ത്യ. ഇതിനെയാണ് ജോണ്‍ ബ്രിട്ടാസ് തെറ്റായ രീതിയില്‍ വ്യാഖ്യാനിക്കുന്നത്. കരുവന്നൂര്‍ ബാങ്കിനെപ്പോലും നന്നാക്കാന്‍ കഴിയാത്ത ഒരു പാര്‍ട്ടിയുടെ പ്രതിനിധിയാണ് ഇന്ത്യയുടെ ബാങ്കിംഗ് രംഗം നേരെയാക്കണമെന്ന് ആവശ്യപ്പെട്ട് ധനമന്ത്രിക്ക് കത്തയക്കുന്നതെന്നത് എത്ര വിരോധാഭാസമാണ്.
ഈ കത്തില്‍ കൂടുതലായും കാത്തലിക് സിറിയന്‍ ബാങ്കിനെക്കുറിച്ചാണ് ജോണ്‍ ബ്രിട്ടാസിന്റെ ആവലാതി. അതിന് പിന്നില്‍ എന്തെങ്കിലും വ്യക്തിതാല്‍പര്യങ്ങളുണ്ടോ എന്നും അറിയില്ല.പുതിയ സാമ്പത്തിക ശക്തിയായി ഉയര്‍ന്നുവരുന്ന ഇന്ത്യയ്‌ക്ക് അനുയോജ്യമായ ബാങ്കിംഗ് മേഖല കെട്ടിപ്പടുക്കാനാണ് ശ്രമം. ജപ്പാനിലെ സുമിടോമോ ബാങ്ക് യെസ് ബാങ്കിലെ ഓഹരികള്‍ ഏറ്റെടുത്തത് ഈയിടെയാണ്. ഏഷ്യയിലെ തന്നെ വന്‍കിട ബിസിനസ് ശൃംഖലകള്‍ക്ക് നിക്ഷേപിക്കാനും വായ്‌പകള്‍ എടുക്കാനും സാധിക്കുന്ന രീതിയില്‍ ബാങ്കുകളുടെ ഡിഎന്‍എ മാറ്റിയെടുക്കാനാണ് മോദി സര്‍ക്കാരിന്റെ ശ്രമം. കാനഡ ആസ്ഥാനമായ ഫെയര്‍ഫാക്സ് കാത്തലിക് സിറിയന്‍ ബാങ്കിനെ ഏറ്റെടുത്തതിന് ശേഷം വിദേശസ്ഥാപനങ്ങളുടെ ഇന്ത്യന്‍ ബാങ്കിംഗ് മേഖലയിലേക്കുള്ള കടന്നുകയറ്റം അപകടകരമായ സൂചനകള്‍ നല്‍കുന്നു എന്നതാണ് ബ്രിട്ടാസിന്റെ പരാതി.
