ന്യൂദല്‍ഹി: ഡിജിറ്റല്‍, സാങ്കേതിക സര്‍വകലാശാല വൈസ് ചാന്‍സലര്‍ നിയമനത്തിനുള്ള മുന്‍ഗണനാപട്ടിക തയാറാക്കിയപ്പോള്‍ മുഖ്യമന്ത്രി മെറിറ്റ് അവഗണിച്ചെന്ന് ഗവര്‍ണര്‍. സുപ്രീംകോടതിയില്‍ ഫയല്‍ ചെയ്ത അപേക്ഷയിലാണ് ഗവര്‍ണര്‍ രാജേന്ദ്ര വിശ്വനാഥ ആര്‍ലേക്കര്‍ ഇക്കാര്യം ചൂണ്ടിക്കാട്ടിയത്.
സുപ്രീംകോടതിയുടെ നിര്‍ദേശത്തിന്റെ അടിസ്ഥാനത്തില്‍ ജസ്റ്റിസ് സുധാന്‍ഷു ദുലിയ അധ്യക്ഷനായ രണ്ട് സെര്‍ച്ച് പാനലുകള്‍ തയാറാക്കിയ രണ്ട് പട്ടികയിലും സ്ഥാനംപിടിച്ച രണ്ടുപേര്‍ക്ക് മുഖ്യമന്ത്രി മുന്‍ഗണന നല്‍കിയില്ലെന്ന് ഗവര്‍ണര്‍ ചൂണ്ടിക്കാട്ടി.
ഡിജിറ്റല്‍, സാങ്കേതിക സര്‍വ്വകലാശാലകള്‍ക്കായി രണ്ട് വ്യത്യസ്ത സെര്‍ച്ച് കമ്മിറ്റികള്‍ ആണ് രൂപീകരിച്ചത്. ഡിജിറ്റല്‍ സര്‍വകലാശാല വൈസ് ചാന്‍സലര്‍ നിയമനത്തിന് അഞ്ച് പേരുള്ള പട്ടികയും സാങ്കേതിക സര്‍വ്വകലാശാല വൈസ് ചാന്‍സലര്‍ നിയമനത്തിന് നാല് പേരുള്ള പട്ടികയുമാണ് ജസ്റ്റിസ് സുധാന്‍ഷു ദുലിയ അധ്യക്ഷനായ സെര്‍ച്ച് കമ്മിറ്റികള്‍ തയാറാക്കിയത്. രണ്ട് പട്ടികയിലും ഉള്‍പ്പെട്ട രണ്ട് പേരുണ്ടായിരുന്നു. ഈ രണ്ട് പേരായിരുന്നു വൈസ് ചാന്‍സലര്‍ നിയമനത്തിന് യോഗ്യരായവര്‍. ഒക്ടോബര്‍ 14ന് മുഖ്യമന്ത്രിയുടെ ഓഫീസ് തനിക്ക് കൈമാറിയ പട്ടികയില്‍ ഈ രണ്ടുപേര്‍ക്കും മുന്‍ഗണന നല്‍കിയില്ലെന്നും ഗവര്‍ണര്‍ ചൂണ്ടിക്കാട്ടുന്നു.
സെര്‍ച്ച് കമ്മിറ്റി യോഗത്തിന്റെ മിനുട്ട്സ് മുഖ്യമന്ത്രി കൈമാറിയിട്ടുണ്ട്. എന്നാല്‍ മറ്റ് രേഖകള്‍ കൈമാറിയിട്ടില്ല. എല്ലാ രേഖകളും ലഭിച്ചാല്‍ മാത്രമേ തീരുമാനമെടുക്കാനാകൂ. എല്ലാം രേഖകളും കൈമാറണമെന്ന് അഭ്യര്‍ത്ഥിച്ച് ജസ്റ്റിസ് സുധാന്‍ഷു ദുലിയക്ക് രണ്ട് മെയിലുകള്‍ അയച്ചു, എന്നാല്‍ മറുപടി ലഭിച്ചില്ല. എല്ലാ രേഖകളും കൈമാറാന്‍ ജസ്റ്റിസ് ദുലിയക്ക് നിര്‍ദ്ദേശം നല്‍കണമെന്നാണ് ഗവര്‍ണര്‍ അഭ്യര്‍ത്ഥിച്ചിരിക്കുന്നത്. അഡ്വ. വെങ്കിട്ട സുബ്രഹ്‌മണി ആണ് ഗവര്‍ണര്‍ക്കുവേണ്ടി അപേക്ഷ സമര്‍പ്പിച്ചത്.
ഇരുസര്‍വകലാശാലകളിലെയും വിസി നിയമനവുമായി ബന്ധപ്പെട്ട് ജസ്റ്റിസ് സുധാന്‍ഷു ദുലിയ നല്‍കിയ ശിപാര്‍ശയില്‍ അടിയന്തിര തീരുമാനം എടുക്കണമെന്ന് സുപ്രീംകോടതി ഇന്നലെ ഗവര്‍ണറോട് നിര്‍ദ്ദേശിച്ചിരുന്നു. കേസ് സുപ്രീംകോടതി അടുത്ത ആഴ്ച വീണ്ടും പരിഗണിക്കും.
