ന്യൂദല്‍ഹി: മുപ്പതാമത് കേരള അന്താരാഷ്‌ട്ര ചലച്ചിത്ര മേള (ഐഎഫ്എഫ്കെ) ഡിസംബര്‍ 12 മുതല്‍ 19 വരെ തിരുവനന്തപുരത്ത് നടക്കുമെന്ന് ചലച്ചിത്ര അക്കാദമി ചെയര്‍മാന്‍ റസൂല്‍ പൂക്കുട്ടിയും വൈസ് ചെയര്‍പേഴ്സണ്‍ കുക്കു പരമേശ്വരനും വാര്‍ത്താസമ്മേളനത്തില്‍ അറിയിച്ചു. 12ന് വൈകിട്ട് ആറു മണിക്ക് നിശാഗന്ധി ഓഡിറ്റോറിയത്തിലെ ഉദ്ഘാടന ചടങ്ങോടെ എട്ടുദിവസത്തെ മേളയ്‌ക്ക് തുടക്കമാവും.
മേളയുടെ ഭാഗമായുള്ള സ്പിരിറ്റ് ഓഫ് സിനിമ പുരസ്‌കാരം കനേഡിയന്‍ ചലച്ചിത്രകാരി കെല്ലി ഫൈഫ് മാര്‍ഷലിന് സമ്മാനിക്കും. അഞ്ച് ലക്ഷം രൂപയും ശില്‍പ്പവും പ്രശംസാ പത്രവുമടങ്ങുന്നതാണ് പുരസ്‌കാരം.
എഴുപതോളം രാജ്യങ്ങളില്‍ നിന്നുള്ള ഇരുനൂറില്‍പ്പരം ചിത്രങ്ങള്‍ മേളയില്‍ പ്രദര്‍ശിപ്പിക്കും. 30-ാമത് പതിപ്പ് പ്രമാണിച്ച് മുന്‍വര്‍ഷങ്ങളിലേതിനേക്കാള്‍ മുപ്പത് ചിത്രങ്ങള്‍ അധികമായി ഉള്‍പ്പെടുത്തി. 16 തിയേറ്ററുകളിലാണ് പ്രദര്‍ശനം. അന്താരാഷ്‌ട്ര മത്സരവിഭാഗത്തില്‍ 14 സിനിമകളും മലയാള സിനിമ ഇന്ന് വിഭാഗത്തില്‍ 12 ചിത്രങ്ങളും ഭാരത സിനിമ ഇപ്പോള്‍ വിഭാഗത്തില്‍ ഏഴ് സിനിമകളും പ്രദര്‍ശിപ്പിക്കും. ലോക സിനിമാ വിഭാഗത്തില്‍ അറുപതിലധികം സിനിമകള്‍ ഉള്‍പ്പെടുത്തി. കലൈഡോസ്‌കോപ്പ് വിഭാഗത്തില്‍ എട്ട് സിനിമകള്‍. ഫിമെയില്‍ ഫോക്കസ്, മിഡ്‌നൈറ്റ് സിനിമ, റെസ്റ്റോര്‍ഡ് ക്ലാസിക്സ് എന്നീ വിഭാഗങ്ങളിലും സിനിമകള്‍ ഉള്‍പ്പെടുത്തിയിട്ടുണ്ട്.
വിഖ്യാത ബംഗാളി ചലച്ചിത്രകാരന്‍ ഋത്വിക് ഘട്ടക്കിന്റെ ജന്മശതാബ്ദിയുടെ ഭാഗമായി അദ്ദേഹത്തിന്റെ നാല് ചിത്രങ്ങള്‍ പ്രദര്‍ശിപ്പിക്കും. സംവിധായകന്‍ ഷാജി എന്‍. കരുണ്‍, സംവിധായകനും തിരക്കഥാകൃത്തുമായ എം.ടി. വാസുദേവന്‍ നായര്‍ എന്നിവര്‍ക്ക് ശ്രദ്ധാഞ്ജലിയര്‍പ്പിക്കുന്ന ഹോമേജ് വിഭാഗത്തില്‍ ഇരുവരുടെയും രണ്ട് ചിത്രങ്ങള്‍ വീതം പ്രദര്‍ശിപ്പിക്കും.
അനുബന്ധ പരിപാടികള്‍ക്കു പുറമെ മൂന്ന് പ്രദര്‍ശനങ്ങളും സംഘടിപ്പിക്കും. 19ന് നിശാഗന്ധിയിലെ സമാപനച്ചടങ്ങില്‍ പുരസ്‌കാരങ്ങള്‍ സമ്മാനിക്കും. കേരള ഹൗസില്‍ നടന്ന വാര്‍ത്താ സമ്മേളനത്തില്‍ അക്കാദമി സെക്രട്ടറി അജോയ് ചന്ദ്രനും പങ്കെടുത്തു.
