ന്യൂദല്ഹി: അഞ്ച് വിദേശ ചിത്രങ്ങള്ക്ക് ഐഎഫ്എഫ്കെയില് പ്രദര്ശനാനുമതി നല്കില്ലെന്നും നയതന്ത്രബന്ധത്തെ ബാധിക്കുമെന്നതിനാലാണിതെന്നും വിദേശകാര്യ മന്ത്രാലയം അറിയിച്ചു.
അപേക്ഷ വൈകി ലഭിച്ചത് അടക്കം ആദ്യം 19 ചിത്രങ്ങള്ക്കായിരുന്നു കേന്ദ്രം അനുമതി നിഷേധിച്ചത്. ഇതില് 12 ചിത്രങ്ങള്ക്ക് പിന്നീട് പ്രദര്ശനാനുമതി നല്കി. ഭാരതത്തില് നിന്നു തന്നെയുള്ള രണ്ട് ചിത്രങ്ങളുടെ കാര്യത്തില് വാര്ത്താവിതരണ പ്രക്ഷേപണ മന്ത്രാലയം തീരുമാനമെടുക്കും.
ഇന്തോനേഷ്യന് ചിത്രമായ എ പോയറ്റ്: അണ്കണ്സീല്ഡ് പോയട്രി, പലസ്തീന് ചിത്രം ഓള് ദാറ്റ് ഈസ് ലെഫ്റ്റ് ടു യു, ഈജിപ്ഷ്യന് സിനിമകളായ ഈഗിള്സ് ഓഫ് ദ റിപ്പബ്ലിക്, ക്ലാഷ്, ഇസ്രായേലി ചിത്രം എന്നിവയ്ക്കാണ് വിദേശകാര്യമന്ത്രാലയം അനുമതി നിഷേധിച്ചത്. പലസ്തീന് ചിത്രമായ പലസ്തീന് 36, വണ്സ് അപ്പോണ് എ ടൈം ഇന് ഗാസ ഉള്പ്പെടെ 12 ചിത്രങ്ങള്ക്കാണ് അനുമതി ലഭിച്ചത്.
ചലച്ചിത്ര മേളകളില് സെന്സര് സര്ട്ടിഫിക്കറ്റ് ഇല്ലാത്ത ചിത്രങ്ങള് വാര്ത്താവിതരണ പ്രക്ഷേപണ മന്ത്രാലയം നല്കുന്ന ‘സെന്സര് എക്സംപ്ഷന് സര്ട്ടിഫിക്കറ്റ്’ ഉപയോഗിച്ചാണ് പ്രദര്ശിപ്പിക്കാറ്. ഇതിനായി സമയബന്ധിതമായി സിനിമകളുടെ പട്ടികയും രേഖകളും കേന്ദ്രസര്ക്കാരിന് കൈമാറണം എന്നാണ് ചട്ടം. സാധാരണ നവംബര് ആദ്യവാരമാണ് ചലച്ചിത്ര അക്കാദമി ഇത്തരം നടപടിക്രമങ്ങള് പൂര്ത്തിയാക്കുക. എന്നാല് ഇത്തവണ അക്കാദമി ഡിസംബറിലാണ് പട്ടിക സമര്പ്പിച്ചത്. ഇതാണ് അനുമതി ലഭിക്കാന് വൈകിയത്. ചലച്ചിത്ര അക്കാദമിയുടെ വീഴ്ച മറച്ചുപിടിക്കാന് വിഷയത്തെ രാഷട്രീയവല്ക്കരിക്കുകയാണെന്ന ആരോപണം ശക്തമാണ്. ഇക്കാര്യം ചൂണ്ടിക്കാട്ടി നിരവധി സിനിമാ പ്രവര്ത്തകര് രംഗത്തെത്തിയിട്ടുണ്ട്.
