പത്തനംതിട്ട: ശബരിമല സ്വര്‍ണക്കൊള്ള സംബന്ധിച്ച അന്വേഷണം മുന്‍ ദേവസ്വം ബോര്‍ഡ് പ്രസിഡന്റ് എ. പത്മകുമാറിന്റെ അറസ്റ്റോടെ വഴിമുട്ടി. ഹൈക്കോടതി നിരീക്ഷണത്തില്‍ കുറ്റമറ്റ രീതിയില്‍ കേസ് പുരോഗമിക്കുമ്പോഴാണ് പത്മകുമാര്‍ അറസ്റ്റിലായത്. സര്‍ക്കാരില്‍ നിന്നുള്ള നിര്‍ദേശത്തിലാണ് താന്‍ മിനിറ്റ്സ് പോലും തിരുത്തി സ്വര്‍ണം പൊതിഞ്ഞ പാളികളെ വെറും ചെമ്പുപാളികളാക്കിയതെന്നാണ് പത്മകുമാര്‍ എസ്ഐടിക്കു മൊഴി നല്കിയത്. ഇതോടെയാണ് അന്വേഷണം മെല്ലെപ്പോക്കായത്.
സര്‍ക്കാര്‍ നിര്‍ദേശമെന്ന പത്മകുമാറിന്റെ മൊഴി അന്നത്തെ ദേവസ്വം മന്ത്രി കടകംപള്ളി സുരേന്ദ്രനിലേക്കാണ് അന്വേഷണം എത്തിക്കുന്നത്. കടകംപള്ളിയെ ചോദ്യംചെയ്താല്‍ സ്വര്‍ണക്കൊള്ളയില്‍ ദേവസ്വം ബോര്‍ഡിനു പുറമേ സര്‍ക്കാരിനും പങ്കെന്ന ആക്ഷേപം ശക്തമാകും. ഇതൊഴിവാക്കാനാണ് അന്വേഷണം മെല്ലപ്പോക്കില്‍ ആയതെന്ന ആരോപണം ശക്തമാണ്. ഇക്കാര്യത്തില്‍ ഇടതു പോലീസ് സംഘടനയുടെ ഇടപെടല്‍ പോലും ഉണ്ടായതായും പ്രചാരണമുണ്ട്.
സ്വര്‍ണപ്പാളി കേസില്‍ ക്രൈംബ്രാഞ്ചിട്ട എഫ്ഐആറില്‍ എട്ടാം പ്രതിസ്ഥാനത്ത് പത്മകുമാറിനെ കൂടാതെ മെംബര്‍മാരായ ശങ്കരദാസും പാറവിള വിജയകുമാറുമുണ്ട്. എന്നാല്‍ പേരിനു വേണ്ടി മാത്രം ശങ്കരദാസിനെ ഒരു തവണ ചോദ്യം ചെയ്തതല്ലാതെ തുടര്‍നടപടി ഉണ്ടായില്ല. ശബരിമലയില്‍ തമിഴ്നാട്ടില്‍ നിന്നും മനീതി സംഘത്തെ എത്തിച്ചതിലും ബിന്ദു അമ്മിണി, കനകദുര്‍ഗ എന്നിവരെ രാത്രിയുടെ മറവില്‍ സന്നിധാനത്തെത്തിച്ചതിലും മുഖ്യമന്ത്രി പിണറായി വിജയന്റെ പ്രത്യേക പ്രീതിക്ക് പാത്രമായ പോലീസ് ഓഫീസര്‍ ഹരിശങ്കറിന്റെ അച്ഛനാണ് ശങ്കരദാസ്.
പാറവിള വിജയകുമാറിന്റെ ഏറ്റവും അടുത്ത സുഹൃത്തായാണ് ഉണ്ണികൃഷ്ണന്‍ പോറ്റി അറിയപ്പെട്ടിരുന്നത്. പോറ്റിയുടെ വെഞ്ഞാറമൂട്ടിലുള്ള വീട്ടില്‍ വിജയകുമാര്‍ പലതവണ എത്തിയിരുന്നു.
കേസുമായി ബന്ധപ്പെട്ട് സ്ഥാനമൊഴിഞ്ഞ ദേവസ്വം ബോര്‍ഡ് പ്രസിഡന്റ് പി. എസ്.പ്രശാന്തിനെ ചോദ്യം ചെയ്യേണ്ടത് അനിവാര്യമായ സാഹചര്യത്തിലാണ് അന്വേഷണം മന്ദഗതിയിലായത് എന്നതും അന്വേഷണ സംഘത്തിനുമേല്‍ സര്‍ക്കാര്‍ സമ്മര്‍ദം ഏറുന്നു എന്ന സംശയമുയര്‍ത്തുന്നു. പ്രശാന്തിനൊപ്പം ബോര്‍ഡില്‍ ഉണ്ടായിരുന്ന സിപിഐ അംഗം എ. അജികുമാറുമായി പോറ്റിക്കുള്ള ബന്ധവും ശ്രദ്ധേയമാണ്. അജികുമാറിന്റെ കുടുംബ ക്ഷേത്രമായ കായംകുളം അറയ്‌ക്കന്‍ അന്നപൂര്‍ണേശ്വരി ക്ഷേത്രത്തില്‍ പ്രദക്ഷിണ വഴി നിര്‍മിച്ചത് പോറ്റിയുടെ സ്പോണ്‍സറിങ്ങില്‍ ആയിരുന്നു. ഇതു സംബന്ധിച്ച ചോദ്യങ്ങള്‍ സിപിഐയെയും കുടുക്കുമെന്നത് ഉറപ്പാണ്.
