തിരുവനന്തപുരം: തെരഞ്ഞെടുപ്പില് നേട്ടമുണ്ടാക്കാന്, ജമാഅത്തെ ഇസ്ലാമിയുടെ രാഷ്ട്രീയ ഘടകമായ വെല്ഫെയര് പാര്ട്ടിയുടെ പിന്നാലെ സിപിഎമ്മും കോണ്ഗ്രസും. സംസ്ഥാന തലത്തില് സഖ്യമുണ്ടാക്കുന്നത് പ്രചാരണ രംഗത്തും വരുന്ന നിയമസഭാ തെരഞ്ഞെടുപ്പിലും തിരിച്ചടിയായേക്കുമെന്നതിനാല് ഇരുകക്ഷികളും പ്രാദേശിക തലത്തില് ചര്ച്ച നടത്തി സഖ്യനീക്കം നടത്തുന്നു. പകരം എസ്ഡിപിഐക്ക് സാധ്യതയുള്ള സ്ഥലങ്ങളില് വോട്ടുനല്കി വിജയിപ്പിക്കാമെന്നും ധാരണ. എസ്ഡിപിഐ ബന്ധം ആരോപിച്ച് പരസ്പരം ചെളിവാരിയെറിയുമ്പോഴും രഹസ്യസഖ്യചര്ച്ചകള് പുരോഗമിക്കുന്നു.
വെല്ഫെയര് പാര്ട്ടിയുമായും എസ്ഡിപിഐയുമായും പരസ്യസഖ്യം ആവാമെന്ന് മുസ്ലിംലീഗിലെ ഭൂരിഭാഗവും വാദിക്കുന്നുണ്ട്. കോഴിക്കോട് ജില്ലയില് മുക്കം മുനിസിപ്പാലിറ്റി, താമരശ്ശേരി, കൊടിയത്തൂര്, വേളം, ആയഞ്ചേരി, ചങ്ങോരത്ത്, തിരുവമ്പാടി പഞ്ചായത്തുകളില് വെല്ഫെയര് പാര്ട്ടിയുമായി യുഡിഎഫ് ധാരണയായതായി സൂചനയുണ്ട്. എന്നാല് ഇത് ചര്ച്ചയാകാതിരിക്കാന് രമേശ് ചെന്നിത്തല ഉള്പ്പെടെയുള്ളവര് പരസ്യമായി വെല്ഫെയര് പാര്ട്ടിയെ തള്ളിപ്പറയുന്നുമുണ്ട്.
സിപിഎമ്മും വെല്ഫെയര് പാര്ട്ടിയെ പരസ്യമായി തള്ളിപ്പറയുമ്പോഴും പലയിടത്തും സഖ്യസാധ്യതകള് തേടുകയാണ്. ചില സ്ഥലങ്ങളില് വെല്ഫെയര് പാര്ട്ടിക്ക് വോട്ടുമറിച്ചു നല്കി സഹായിക്കാനും തിരിച്ച് ജമാഅത്തെ ഇസ്ലാമിക്ക് സ്വാധീനമുള്ള കോഴിക്കോടും മലപ്പുറവും ഉള്പ്പെടെയുള്ള സ്ഥലങ്ങളില് മുസ്ലിം വോട്ടുകള് സിപിഎമ്മിന് മറിച്ചു നല്കണമെന്നുമാണ് സന്ധിസംഭാഷണം.
ഇരുമുന്നണികളും പരസ്യമായി അകലം പാലിക്കുന്നതിനെക്കുറിച്ച് വെല്ഫെയര് പാര്ട്ടി കേന്ദ്രങ്ങള് വെളിപ്പെടുത്തുന്നത് ഇതെല്ലാം രാഷ്ട്രീയത്തിന്റെ ഭാഗമാണെന്നാണ്. എല്ഡിഎഫും യുഡിഎഫും മുന്കാലങ്ങളില് വെല്ഫെയര് പാര്ട്ടിയുമായി സഹകരിച്ചിട്ടുണ്ടെന്നും ആ സഹകരണത്തിന്റെ സാധ്യത ഇത്തവണയും ഉണ്ടെന്നുമാണ് വെല്ഫെയര് പാര്ട്ടി നേതൃത്വം വ്യക്തമാക്കുന്നത്.
ബിജെപി ഒഴികെയുള്ള ഏത് രാഷ്ട്രീയ കക്ഷിയുമായും ധാരണയ്ക്ക് പ്രാദേശിക ഘടകങ്ങള്ക്ക് അനുവാദം നല്കിയിട്ടുണ്ടെന്ന് വെല്ഫെയര് പാര്ട്ടി സംസ്ഥാന ജനറല് സെക്രട്ടറി കെ.എ. ഷഫീഖ് പറഞ്ഞു. ഏതൊക്കെ സീറ്റുകളില് ഏതെല്ലാം രാഷ്ട്രീയ പാര്ട്ടികളുമായി സഖ്യമുണ്ടെന്ന് പ്രദേശിക ഘടകങ്ങളാണ് തീരുമാനിക്കുന്നതെന്നും അതിന് സംസ്ഥാന നേതൃത്വം അനുവാദം നല്കിയിട്ടുണ്ടെന്നും ഷഫീഖ് പറഞ്ഞു.
