ന്യൂദൽഹി: 76-ാമത് ദേശീയ ഭരണഘടനാ ദിനം ഇന്ന് രാജ്യമെമ്പാടും ആഘോഷിക്കും. ഇതിനോടനുബന്ധിച്ച് പഴയ പാർലമെന്റ് ഹൗസിൽ ഒരു ദേശീയ പരിപാടി നടക്കും. ഭരണഘടനാ ഭവനത്തിന്റെ സെൻട്രൽ ഹാളിലാണ് ഈ പരിപാടി നടക്കുക.
ഭരണഘടനാ ദിനത്തോടനുബന്ധിച്ച് പ്രധാനമന്ത്രി നരേന്ദ്രമോദി തന്റെ എക്സ് അക്കൗണ്ടിൽ ആശംസകൾ അറിയിച്ചു.
“ഭരണഘടനാ ദിനത്തിൽ, നമ്മുടെ ഭരണഘടനയുടെ സ്ഥാപക പൂർവികർക്ക് ആദരാഞ്ജലി അർപ്പിക്കുന്നു. അവരുടെ ദർശനം എല്ലായ്‌പ്പോഴും ഒരു വികസിത ഇന്ത്യ കെട്ടിപ്പടുക്കാൻ നമ്മെ പ്രചോദിപ്പിക്കുന്നു” – പ്രധാനമന്ത്രി എക്സിൽ എഴുതി.
കൂടാതെ ഭരണഘടന നമ്മുടെ കടമകളെ ഓർമ്മിപ്പിക്കുന്നു.
മനുഷ്യന്റെ അന്തസ്സ്, സമത്വം, സ്വാതന്ത്ര്യം എന്നിവയ്‌ക്ക് നമ്മുടെ ഭരണഘടന ഏറ്റവും ഉയർന്ന മൂല്യം നൽകുന്നുവെന്ന് അദ്ദേഹം തുടർന്നു എഴുതി.
ഇതിനു പുറമെ അവകാശങ്ങൾ നൽകി നമ്മെ ശാക്തീകരിക്കുന്നതിനൊപ്പം, പൗരന്മാരെന്ന നിലയിൽ നമ്മുടെ കടമകളെക്കുറിച്ചും ഇത് നമ്മെ ഓർമ്മിപ്പിക്കുന്നു, അത് നിറവേറ്റാൻ നാം എപ്പോഴും പരിശ്രമിക്കേണ്ടതുണ്ട്. ശക്തമായ ഒരു ജനാധിപത്യത്തിന്റെ അടിത്തറയാണ് ഈ കടമകൾ. നമ്മുടെ പ്രവർത്തനങ്ങളിലൂടെ ഭരണഘടനാ മൂല്യങ്ങൾ ശക്തിപ്പെടുത്തുന്നതിനുള്ള നമ്മുടെ പ്രതിബദ്ധത നമുക്ക് വീണ്ടും ഉറപ്പിക്കാമെന്നും മോദി എക്സിൽ കുറിച്ചു.
അതേ സമയം ഭരണഘടനാ ദിനത്തിൽ പഴയ പാർലമെന്റ് ഹൗസിൽ ഒരു ദേശീയ പരിപാടി നടക്കും. രാഷ്‌ട്രപതി ദ്രൗപതി മുർമു അധ്യക്ഷത വഹിക്കും, ഉപരാഷ്‌ട്രപതി സി.പി. രാധാകൃഷ്ണൻ, പ്രധാനമന്ത്രി മോദി, ലോക്‌സഭാ സ്പീക്കർ, കേന്ദ്രമന്ത്രിമാർ, പാർലമെന്റിന്റെ ഇരുസഭകളിലെയും അംഗങ്ങൾ എന്നിവർ ചരിത്രപരമായ പരിപാടിയിൽ പങ്കെടുക്കും.
