ന്യൂദല്‍ഹി: ദുബായില്‍ അപകടത്തില്‍പ്പെട്ട ഇന്ത്യന്‍ വ്യോമസേനയുടെ തേജസ് യുദ്ധവിമാനത്തിന്റെ പുതിയ വീഡിയോ ദൃശ്യം പുറത്ത്. പൈലറ്റായ വിങ് കമാന്‍ഡര്‍ നമാംശ് സ്യാല്‍ അവസാന നിമിഷം പുറത്തുചാടാന്‍ ശ്രമിച്ചിരുന്നു എന്ന് സൂചന നല്‍കുന്ന ദൃശ്യമാണ് ഡബ്‌ളിയുു ട്രാന്‍സ് ഏവിയേഷന്‍ വീഡിയോസ് പോസ്റ്റ് ചെയ്തിരിക്കുന്നത്.
വീഡിയോയുടെ 49-52 സെക്കന്‍ഡില്‍, വിമാനം തീഗോളമായി മാറുന്ന സമയത്ത്, പാരച്യൂട്ട് പോലുള്ള ഒരു വസ്തു കാണാം. പൈലറ്റ് പുറത്തുചാടാന്‍ ശ്രമിച്ചെങ്കിലും സമയം വൈകിപ്പോയിരുന്നു എന്ന് ഇത് സൂചിപ്പിക്കുന്നു. മികച്ച സുരക്ഷാ റിക്കാര്‍ഡുള്ള വിമാനത്തിന്റെ നിയന്ത്രണം വീണ്ടെടുക്കാനും അതിനെ രക്ഷിക്കാനും പൈലറ്റ് ശ്രമിച്ചതുകൊണ്ടാകാം ഇത് സംഭവിച്ചത് എന്നാണ് വിദഗ്ധരുടെ അനുമാനം. എയര്‍ഷോയിലെ ഒരു കാണിയാണ് ഈ പുതിയ വീഡിയോ പകര്‍ത്തിയതെന്ന് കരുതുന്നു.
വീഡിയോയില്‍, തേജസ് ജെറ്റ് ‘ബാരല്‍ റോള്‍’ എന്നറിയപ്പെടുന്ന ഒരു അഭ്യാസപ്രകടനം നടത്തുന്നത് കാണാം, ഇതില്‍ ജെറ്റ് തലകീഴായി മറിഞ്ഞ ശേഷം വീണ്ടും നേരെയാകുന്നു. തകര്‍ന്നുവീഴുന്നതിന് തൊട്ടുമുന്‍പ്, ജെറ്റ് ഒരു ‘നെഗറ്റീവ്-ജി ടേണ്‍’ നടത്തുകയായിരുന്നു. എന്നാല്‍ ഈ സമയത്ത്, ജെറ്റ് വളരെ താഴ്ന്നാണ് പറന്നിരുന്നത്. നിലത്ത് തകര്‍ന്നുവീഴുന്നതിന് മുന്‍പ് ജെറ്റ് കൂടുതല്‍ കൂടുതല്‍ താഴേക്ക് പോയി. യുദ്ധവിമാനത്തെ സ്ഥിരപ്പെടുത്തി ഉയരം വീണ്ടെടുക്കുന്നതിനുള്ള ഒരു ‘പോസ്റ്റ്-ലൂപ്പ്’ അഭ്യാസത്തിന് അവിടെ സാധ്യതയുണ്ടായിരുന്നില്ലെന്ന് വ്യോമയാന വിദഗ്ധര്‍ പറഞ്ഞു. എന്നിരുന്നാലും, അപകടത്തിന്റെ യഥാര്‍ത്ഥ കാരണം അന്വേഷണത്തിന് ശേഷമേ വ്യക്തമാകൂ.
അതേസമയം വീരമൃത്യു വരിച്ച വിങ് കമാന്‍ഡര്‍ നമന്‍ഷ് സ്യാലിന്റെ മൃതദേഹം ഇന്ന് നാട്ടിലെത്തിക്കും.
ദല്‍ഹിയിലെത്തിക്കുന്ന മൃതദേഹം നടപടിക്രമങ്ങള്‍ പൂര്‍ത്തിയാക്കി സ്വദേശമായ ഹിമാചലിലെ കാംഗ്രയിലേക്കു കൊണ്ടുപോകും. ഭാര്യ അഫ്‌സാനും വ്യോമസേനയിലെ പൈലറ്റാണ്. നമന്‍ഷ് സ്യാലിന്റെ മാതാപിതാക്കള്‍ കോയമ്പത്തൂരിലെ സുളൂര്‍ വ്യോമത്താവളത്തിലാണ് ഉള്ളത്. അച്ഛന്‍ ജഗന്നാഥ് സ്യാല്‍ ഭാരത സൈന്യത്തില്‍ ജോലി ചെയ്തിട്ടുണ്ട്. പിന്നീട് വിദ്യാഭ്യാസ വകുപ്പില്‍ ജോലി ചെയ്തു. പ്രിന്‍സിപ്പലായാണ് വിരമിച്ചത്.
