കൊച്ചി: എറണാകുളത്ത് ജില്ലാ പഞ്ചായത്ത് സ്ഥാനാര്‍ത്ഥിയുടെ പത്രിക തള്ളിയത് യുഡിഎഫിന് തിരിച്ചടിയായി.കടമക്കുടി ഡിവിഷനില്‍ നിന്ന് മത്സരിക്കുന്ന എല്‍സി ജോര്‍ജിന്റെ പത്രികയാണ് തള്ളിയത്.
വയനാട്ടിലും കൊല്ലത്തും കോട്ടയത്തും ആലങ്ങാട് ബ്ലോക്ക് പഞ്ചായത്തിലും യുഡിഎഫ് സ്ഥാനാര്‍ത്ഥികളുടെ പത്രിക തള്ളി.സംസ്ഥാനത്ത് നാമനിര്‍ദേശപത്രികകളുടെ സൂക്ഷ്മ പരിശോധന പൂര്‍ത്തിയായപ്പോള്‍ യുഡിഎഫിന് ആണ് കൂടുതല്‍ തിരിച്ചടി നേരിട്ടത്.വയനാട് കല്‍പ്പറ്റ നഗരസഭയില്‍ യുഡിഎഫിന്റെ നഗരസഭാ ചെയര്‍മാന്‍ സ്ഥാനാര്‍ഥി രവീന്ദ്രന്റെ നാമനിര്‍ദ്ദേശപത്രികയും തള്ളി.പകരം സി എസ് പ്രഭാകരന്‍ സ്ഥാനാര്‍ത്ഥിയാകും.
കൊല്ലത്ത് വിളക്കുടി പഞ്ചായത്ത് അഞ്ചാം വാര്‍ഡ് സ്ഥാനാര്‍ത്ഥി നാസറുദ്ദീന്റെ പത്രിക തള്ളി.കോട്ടയം പാമ്പാടി പഞ്ചായത്തില്‍ രമണി മത്തായിയുടെ പത്രികയും തള്ളി. എറണാകുളം ആലങ്ങാട് ബ്ലോക്ക് പഞ്ചായത്തില്‍ മത്സരിക്കുന്ന സെറീന ഷാജിയുടെയും ജോണ്‍സണ്‍ പുനത്തിലിന്റെയും പത്രികയും തള്ളി. ഇവിടെ ഡമ്മി സ്ഥാനാര്‍ത്ഥികളെ നിര്‍ത്തിയിട്ടില്ല.
അതിനിടെ ട്രാന്‍സ്‌ജെന്‍ഡര്‍ അരുണിമയുടെയും തിരുവനന്തപുരം ജില്ലാ പഞ്ചായത്തിലെ യുഡിഎഫ് സ്ഥാനാര്‍ത്ഥി ട്രാന്‍സ് വുമണ്‍ അമയ പ്രസാദിന്റെയും നാമനിര്‍ദ്ദേശപത്രിക സ്വീകരിച്ചു. അതേസമയം പാലക്കാട് നഗരസഭയില്‍ എല്‍ഡിഎഫിന് കനത്ത തിരിച്ചടി ഉണ്ടായി. കര്‍ണകി നഗര്‍ വെസ്റ്റ്, വടക്കന്തറ എന്നിവിടങ്ങളിലെ സ്ഥാനാര്‍ത്ഥികളുടെ പത്രികകളാണ് തള്ളിയത്. മലപ്പുറം വഴിക്കടവ്, തൃക്കാക്കര നഗരസഭാ ഡിവിഷന്‍, മലപ്പുറം വളാഞ്ചേരി നഗരസഭ എന്നിവിടങ്ങളില്‍ എല്‍ഡിഎഫ് സ്ഥാനാര്‍ത്ഥികളുടെ പത്രിക തള്ളി. ശ്രീനാരായണപുരത്തും ആലപ്പുഴ നഗരസഭയിലും ബിജെപിക്കും തിരിച്ചടിയേറ്റു.
