ആലപ്പുഴ: തദ്ദേശ തെരഞ്ഞെടുപ്പില്‍ ജില്ലാ പഞ്ചായത്ത് അമ്പലപ്പുഴ ഡിവിഷനിലെ സ്ഥാനാര്‍ത്ഥി പ്രഖ്യാപനത്തെ തുടര്‍ന്ന് കോണ്‍ഗ്രസില്‍ പൊട്ടിത്തെറി. രമേശ് ചെന്നിത്തല അനുയായിയായ യൂത്ത് കോണ്‍ഗ്രസ് ജില്ലാ പ്രസിഡന്റിനെ ഒഴിവാക്കി കെ. സി. വേണുഗോപാല്‍ പക്ഷക്കാരനെ സ്ഥാനാര്‍ത്ഥിയായി പ്രഖ്യാപിച്ചതിനെതിരെ പ്രവര്‍ത്തകര്‍ പരസ്യമായി രംഗത്തെത്തി.
യൂത്ത് കോണ്‍ഗ്രസ് ജില്ലാ പ്രസിഡന്റ് എം.പി പ്രവീണിന് സീറ്റ് നല്‍കിയില്ല. എ. ആര്‍ കണ്ണനാണ് കോണ്‍ഗ്രസ് സ്ഥാനാര്‍ത്ഥി. മത്‌സ്യത്തൊഴിലാളി കോണ്‍ഗ്രസ് സംസ്ഥാന ജനറല്‍ സെക്രട്ടറി ആണ് കണ്ണന്‍. നേരത്തെ ജില്ലാ പഞ്ചായത്തംഗവുമായിരുന്നു. അതേസമയം, സ്ഥാനാര്‍ത്ഥി നിഷേധത്തില്‍ അതൃപ്തിയുമായി എം. പി പ്രവീണ്‍ രംഗത്തെത്തി. പോലീസില്‍ നിന്ന് കിട്ടിയ അടിയേക്കാള്‍ വേദനയെന്ന് ഫേസ്ബുക്ക് പോസ്റ്റില്‍ പറയുന്നു. നിലവില്‍ സീറ്റുമായി ബന്ധപ്പെട്ട് വിവിധയിടങ്ങളില്‍ പ്രതിഷേധങ്ങള്‍ ഉയരുന്നുണ്ട്.
”പോലീസില്‍ നിന്ന് കിട്ടിയ അടിയേക്കാള്‍ വേദന തോന്നുന്ന നീതിയില്ലാത്ത തീരുമാനം വരുമ്പോള്‍ കോണ്‍ഗ്രസ് പാര്‍ട്ടിക്ക് വേണ്ടി ജീവിതം ഉഴിഞ്ഞുവച്ച മത്സ്യതൊഴിലാളിയായ ഒരച്ഛനും മകനും തീര്‍ത്തും നിസ്സഹായരാണ്. കാലം സാക്ഷി. ചരിത്രം സാക്ഷി..പ്രതിസന്ധികളിലും പോരാട്ടങ്ങളിലും കൂടെ നിന്ന ഏവര്‍ക്കും നന്ദി” -പ്രവീണ്‍ ഫേസ്ബുക്കില്‍ കുറിച്ചു. പോലീസ് മര്‍ദ്ദനമേല്‍ക്കുന്നതിന്റെ ചിത്രങ്ങളും ഫേസ്ബുക്ക് പോസ്റ്റില്‍ പങ്കുവെച്ചിട്ടുണ്ട്. പോ
സ്റ്റിനടിയില്‍ യൂത്ത് കോണ്‍ഗ്രസുകാര്‍ കോണ്‍ഗ്രസ് നേതൃത്വത്തിനെതിരെ അതിരൂക്ഷ വിമര്‍ശനങ്ങളാണ് ഉയര്‍ത്തുന്നത്. യുവാക്കളെ തഴഞ്ഞ് നേതൃത്വത്തിന്റെ പെട്ടിപിടുത്തക്കാരെ സ്ഥാനാര്‍ത്ഥിയാക്കിയെന്നാണ് ആക്ഷേപം.
അതിനിടെ അമ്പലപ്പുഴ ഡിവിഷനില്‍ കോണ്‍ഗ്രസിനെതിരെ മുസ്ലീം ലീഗും പത്രിക നല്‍കി. എംഎസ്എഫ് സംസ്ഥാന വൈസ് പ്രസിഡന്റ് അഡ്വ:അല്‍ത്താഫ് സുബൈറാണ് പത്രിക നല്‍കിയത് ഇതോടെ ഇവിടെ യുഡിഎഫിന്റെ അവസ്ഥ പരിതാപകരമായി. ജില്ലയില്‍ വിവിധ പ്രദേശങ്ങളില്‍ യുഡിഎഫ് സംവിധാനം തകര്‍ന്ന നിലയിലാണ്. അമ്പലപ്പുഴ ഡിവിഷനില്‍ എന്‍ഡിഎ സ്ഥാനാര്‍ത്ഥി അരുണ്‍ അനിരുദ്ധനാണ്. ബിജെപി ആലപ്പുഴ നോര്‍ത്ത് ജില്ലാ ജനറല്‍ സെക്രട്ടറിയായ അരുണ്‍ പ്രചാരണ പ്രവര്‍ത്തനങ്ങളില്‍ ഏറെ മുന്നിലാണ്.
