ന്യൂദല്‍ഹി: അല്‍ ഫലാഹ് ഡോക്ടര്‍മാരായ മുസമ്മലിന്റെയും ആദിലിന്‍റയും മൊബൈല്‍ ഫോണുകളില്‍ ബോംബുണ്ടാക്കുന്നത് സംബന്ധിച്ച് 80ഓളം വീഡിയോകള്‍ കണ്ടെടുത്തു. ബോംബുണ്ടാക്കാനും കെമിക്കല്‍ റിയാക്ഷനുകള്‍, ചെയിന്‍ റിയാക്ഷനുകള്‍ എന്നിവ നടത്താനും ഉള്ള അറിവുകള്‍ പകര്‍ന്നുതരുന്ന വീഡിയോകളാണ് അധികവും. ഇവരുടെ മൊബൈല്‍ ഫോണുകളില്‍ നിന്നും മായ്ച്ച് കളഞ്ഞ വീഡിയോകളും സന്ദേശങ്ങളും ഫോറന്‍സിക് പരിശോധനയില്‍ വീണ്ടെടുത്തപ്പോഴാണ് ഞെട്ടിക്കുന്ന ഈ വീഡിയോകള്‍ ശ്രദ്ധയില്‍പ്പെട്ടത്.
പുല്‍വാമയിലെ ഡോക്ടര്‍ മുസമ്മില്‍ ഷക്കീര്‍ ഗനൈ, അനന്ത് നാഗിലെ ഡോക്ടര്‍ അദീല്‍ അഹമ്മദ് റാദര്‍, ലഖ്നോവില്‍ നിന്നുള്ള വനിതാഡോക്ടറായ ഷഹീന്‍ ഷഹീദ്, ഷോപിയാനില്‍ നിന്നുള്ള മുഫ്തി ഇര്‍ഫാന്‍ അഹമ്മദ് വാഗൈ എന്നിവരുടെ ഫോണുകളില്‍ നിന്നും നിരവധി മായ്ച്ചുകളഞ്ഞ വീഡിയോകള്‍ വീണ്ടെടുക്കാന്‍ സാധിച്ചു.ഇവര്‍ ജെയ്ഷ് എ മുഹമ്മദ് നേതാവ് മസൂദ് അസറിന്റെയും അസഗറിന്റെയും മറ്റ് ഭീകരവാദികളുടുയെ വീഡിയോകള്‍ നിരന്തരം കേട്ടിരുന്നു. ഈ വീഡിയോകളും കണ്ടെടുത്തു.
ഇന്ത്യയിലെ അയോധ്യക്ഷേത്രമുള്‍പ്പെടെ നിരവധി ക്ഷേത്രങ്ങളുടെ വീഡിയോകള്‍, ദല്‍ഹി, ഉത്തര്‍പ്രദേശ്, മുംബൈ എന്നിവിടങ്ങളിലെ ആള്‍ക്കൂട്ടം തിങ്ങിനിറഞ്ഞ മാര്‍ക്കറ്റുകളുടെ വീഡിയോകള്‍ എന്നിവ ഡോക്ടര്‍ മുസമ്മിലിന്റെ ഫോണില്‍ നിന്നും കിട്ടി. ഇവിടങ്ങളില്‍ സ്ഫോടനപരമ്പര സൃഷ്ടിക്കുകയായിരുന്നു ലക്ഷ്യം.
തുര്‍ക്കിയില്‍ ഡോക്ടര്‍ മുസമ്മിലും ഡോക്ടര്‍ ഉമര്‍ നബിയും ചേര്‍ന്ന് സിറിയയിലെ ഐഎസ് ഐഎസ് കമാന്‍ഡറുമായി 2022ല്‍ കൂടിക്കാഴ്ച നടത്തിയിരുന്നു.
