ന്യൂദൽഹി : ബീഹാർ തെരഞ്ഞെടുപ്പിൽ 202 സീറ്റുകൾ നേടി എൻഡിഎ ചരിത്ര വിജയം നേടിയിരിക്കുന്നു. ബീഹാർ തെരഞ്ഞെടുപ്പ് ഫലങ്ങൾ കണക്കിലെടുക്കുമ്പോൾ, സീറ്റുകളുടെ എണ്ണത്തിൽ മാത്രമല്ല, 2020 നും 2025 നും ഇടയിലുള്ള വിജയ-പരാജയ വ്യത്യാസത്തിലും കാര്യമായ മാറ്റം ഉണ്ടായിട്ടുണ്ട്. ഉത്തർപ്രദേശ് മുഖ്യമന്ത്രി യോഗി ആദിത്യനാഥ് റാലികൾ നടത്തിയ 31 നിയമസഭാ സീറ്റുകളിലാണ് ഈ മാറ്റം സംഭവിച്ചത്.
2020 ൽ 31 സീറ്റുകളിൽ 20 എണ്ണമായിരുന്നു എൻഡിഎ നേടിയത് . എന്നാൽ ഇത്തവണ യോഗി ആദിത്യനാഥ് റാലികൾ നടത്തിയ ബീഹാറിലെ 31 സീറ്റുകളിൽ 26 എണ്ണം എൻ ഡി എ തന്നെ നേടി. യോഗി ആദിത്യനാഥിന്റെ റാലികൾ അന്തരീക്ഷം മാറ്റിമറിക്കുക മാത്രമല്ല, പൊതുജനവിശ്വാസം വർദ്ധിപ്പിക്കുകയും ചെയ്തു. മുസാഫർനഗർ നിയമസഭാ സീറ്റിലെ ഫലങ്ങൾ ഈ അവകാശവാദത്തെ ശക്തിപ്പെടുത്തുന്നു. 2020 ലെ നിയമസഭാ തെരഞ്ഞെടുപ്പിൽ കോൺഗ്രസിന്റെ വിജേന്ദ്ര ചൗധരി 6,326 വോട്ടുകൾക്ക് വിജയിച്ചിരുന്നു. എന്നാൽ 2025 ലെ തെരഞ്ഞെടുപ്പിൽ ബിജെപിയുടെ രഞ്ജൻ കുമാർ 32,657 വോട്ടുകളുടെ വൻ ഭൂരിപക്ഷത്തിൽ വിജയിച്ചു.
2020 ലെ തിരഞ്ഞെടുപ്പിൽ, കോൺഗ്രസിന്റെ സഞ്ജയ് തിവാരി 3,892 വോട്ടുകൾക്ക് ബക്സർ അസംബ്ലി സീറ്റ് നേടി. 2025 ലെ തിരഞ്ഞെടുപ്പിൽ, ബിജെപിയുടെ ആനന്ദ് മിശ്ര 28,253 വോട്ടുകളുടെ വൻ ഭൂരിപക്ഷത്തിന് വിജയിച്ചു. അതുപോലെ, 2020 ലെ തിരഞ്ഞെടുപ്പിൽ, ആർജെഡിയുടെ അവധ് ബിഹാരി ചൗധരി 1,973 വോട്ടുകൾക്ക് സിവാൻ അസംബ്ലി സീറ്റ് നേടി. ഇത്തവണ, ബിജെപി സ്ഥാനാർത്ഥി മംഗൾ പാണ്ഡെ 9,370 വോട്ടുകളുടെ ഭൂരിപക്ഷത്തിലാണ് സിവാൻ സീറ്റ് നേടിയത്. ഈ കണക്കുകൾ പുറത്ത് വന്നതോടെ അടുത്ത തെരഞ്ഞെടുപ്പിലും യുപിയുടെ അമരത്ത് യോഗി തന്നെയാകുമെന്ന് ഉറപ്പാണെന്നാണ് റിപ്പോർട്ടുകൾ.
