ന്യൂദല്‍ഹി: തെരഞ്ഞെടുപ്പ് കമ്മിഷനെതിരെ തെറ്റായ ആരോപണങ്ങള്‍ ഉന്നയിക്കുന്നതിനെതിരെ ലോക്സഭാ പ്രതിപക്ഷ നേതാവ് രാഹുല്‍ ഗാന്ധിക്ക് പ്രമുഖരുടെ തുറന്ന കത്ത്. റിട്ട. ജഡ്ജിമാര്‍, റിട്ട. സിവില്‍ സര്‍വീസ് ഉദ്യോഗസ്ഥര്‍, വിരമിച്ച ഉന്നത സൈനിക ഉദ്യോഗസ്ഥര്‍ എന്നിവരടങ്ങുന്ന 272 പേരാണ് ഈ തുറന്ന കത്തില്‍ ഒപ്പിട്ടിരിക്കുന്നത്.
തെരഞ്ഞെടുപ്പ് കമ്മിഷന്‍ ഉള്‍പ്പെടെയുള്ള രാജ്യത്തെ ഭരണഘടനാ സ്ഥാപനങ്ങളെ ദുര്‍ബലപ്പെടുത്താനാണ് രാഹുലും കോണ്‍ഗ്രസും ശ്രമിക്കുന്നതെന്ന് കത്തില്‍ ചൂണ്ടിക്കാട്ടുന്നു. കമ്മിഷനിലും ഭരണഘടനാ സ്ഥാപനങ്ങളിലും ജനങ്ങള്‍ക്കുള്ള വിശ്വാസം നഷ്ടപ്പെടുത്തി അവിശ്വാസം ജനിപ്പിക്കുകയാണ് രാഹുല്‍ ചെയ്യുന്നത്. അടിസ്ഥാനരഹിതമായ ആരോപണങ്ങളിലൂടെയും വിഷലിപ്തമായ വാക്കുകളിലൂടെയും രാജ്യത്തെ ഭരണഘടനാ സ്ഥാപനങ്ങള്‍ തകര്‍ന്നുവെന്ന പ്രതീതി സൃഷ്ടിക്കുകയാണ് ചെയ്യുന്നതെന്നും കത്തിലുണ്ട്.
വോട്ട് മോഷണം, സൈന്യത്തിന്റെ അഭിമാനത്തെ ചോദ്യംചെയ്യല്‍, തെരഞ്ഞെടുപ്പ് കമ്മിഷനെതിരായ തെറ്റായ ആരോപണങ്ങള്‍ തുടങ്ങിയ വിഷയങ്ങളാണ് കത്തിലുള്ളത്. വോട്ട് മോഷണം നടന്നെന്ന് രാഹുല്‍ ആവര്‍ത്തിച്ച് ആരോപിച്ചെങ്കിലും ഇത് തെളിയിക്കുന്നതിന് ആവശ്യമായ സത്യവാങ്മൂലമോ പരാതിയോ നല്‍കിയില്ല. സൈനികരുടെ ധീരതയെയും നേട്ടങ്ങളെയും ആദ്യം ചോദ്യം ചെയ്തു. പിന്നാലെ നീതിന്യായ വ്യവസ്ഥയുടെ നിഷ്പക്ഷതയെ ചോദ്യം ചെയ്തു. ഇപ്പോള്‍ രാഹുല്‍ തെരഞ്ഞെടുപ്പ് കമ്മിഷനെതിരെ തിരിഞ്ഞിരിക്കുകയാണെന്നും കത്തില്‍ പറയുന്നു.
രാഹുല്‍ ഉയര്‍ത്തിയ ആരോപണങ്ങളൊക്കെ കോടതി മേല്‍നോട്ടത്തിലുള്ള പരിശോധനയിലൂടെയും കമ്മിഷന്‍ അതിന്റെ പ്രവര്‍ത്തനരീതി വിശദീകരിക്കുകയും ചെയ്തതിലൂടെയും ഇല്ലാതായി. കോടതിയുടെ നിര്‍ദേശത്തിന്റെ അടിസ്ഥാനത്തില്‍ അര്‍ഹരല്ലാത്തവരുടെ പേരുകള്‍ നീക്കുകയും പുതിയ വോട്ടര്‍മാരെ ചേര്‍ക്കുകയും ചെയ്തതിനാല്‍ ഈ പ്രചാരണങ്ങള്‍ തകരുകയാണ്. തെരഞ്ഞെടുപ്പില്‍ പരാജയപ്പെട്ട നേതാക്കള്‍ സ്വന്തം വിശ്വാസ്യത തിരിച്ചുപിടിക്കുന്നതിന് പകരം ഭരണഘടനാ സ്ഥാപനങ്ങള്‍ക്ക് നേരെ തിരിയുന്നത് അധികാരമില്ലാത്തതിന്റെ രോഷപ്രകടനമാണെന്നും കത്തില്‍ കുറ്റപ്പെടുത്തുന്നു.
ദല്‍ഹി ഹൈക്കോടതി മുന്‍ ജഡ്ജി ജസ്റ്റിസ് എസ്.എന്‍. ധിംഗ്ര, മുന്‍ ഝാര്‍ഖണ്ഡ് ഡിജിപി നിര്‍മ്മല്‍ കൗര്‍ തുടങ്ങിയവരുടെ നേതൃത്വത്തില്‍ 16 റിട്ട. ജഡ്ജിമാര്‍, 14 മുന്‍ അംബാസഡര്‍മാര്‍ അടക്കം 123 റിട്ട. സിവില്‍ സര്‍വീസ് ഉദ്യോഗസ്ഥര്‍, 133 വിരമിച്ച സായുധസേന ഉദ്യോഗസ്ഥര്‍ എന്നിവരാണ് രാഹുലിന് തുറന്ന കത്ത് എഴുതിയിരിക്കുന്നത്.
