പട്ന: എന്ഡിഎ വന്വിജയം നേടിയ ബീഹാറില് ഇന്ന് ജെഡിയു പ്രസിഡന്റ് നിതീഷ്കുമാര് മുഖ്യമന്ത്രിയായി സത്യപ്രതിജ്ഞ ചെയ്യും.
ഉച്ചയ്ക്ക് 1.30ന് പട്നയിലെ ഗാന്ധി മൈതാനത്താണ് ചടങ്ങ്. ഗവര്ണര് ആരിഫ് മുഹമ്മദ് ഖാന് സത്യവാചകം ചൊല്ലിക്കൊടുക്കും. പ്രധാനമന്ത്രി നരേന്ദ്ര മോദി, കേന്ദ്ര ആഭ്യന്തരമന്ത്രി അമിത് ഷാ, ബിജെപി ദേശീയ പ്രസിഡന്റ് ജെ.പി. നഡ്ഡ, എന്ഡിഎ മുഖ്യമന്ത്രിമാര് എന്നിവരുള്പ്പെടെയുള്ളവര് പങ്കെടുക്കും. പത്താം തവണയാണ് നിതീഷ് ബീഹാറിന്റെ മുഖ്യമന്ത്രിയാകുന്നത്.
ഇന്നലെ വൈകിട്ട് ചേര്ന്ന എന്ഡിഎ എംഎല്എമാരുടെ യോഗം നിതീഷിനെ നേതാവായി തെരഞ്ഞെടുത്തു. ബിജെപി നേതാവ് സമരത് ചൗധരിയാണ് നിതീഷിനെ നിര്ദ്ദേശിച്ചത്. തുടര്ന്ന് രാജ്ഭവനിലെത്തി ഗവര്ണര് ആരിഫ് മുഹമ്മദ് ഖാനുമായി കൂടിക്കാഴ്ച നടത്തി. ഗവര്ണര് സര്ക്കാര് രൂപീകരിക്കാന് നിതീഷിനെ ക്ഷണിച്ചു. ബിജെപി നേതാക്കളായ സാമ്രാട്ട് ചൗധരി, വിജയ് കുമാര് സിന്ഹ, എല്ജെപി (ആര്വി) നേതാവും കേന്ദ്രമന്ത്രിയുമായ ചിരാഗ് പാസ്വാന്, എച്ച്എഎം (എസ്) നേതാവും കേന്ദ്രമന്ത്രിയുമായ ജിതന് റാം മാഞ്ചി, ആര്എല്എം മേധാവി ഉപേന്ദ്ര കുശ്വാഹ എന്നിവരും ഒപ്പമുണ്ടായിരുന്നു. രാവിലെ ചേര്ന്ന ബിജെപി എംഎല്എമാരുടെ യോഗം സാമ്രാട്ട് ചൗധരിയെ കക്ഷി നേതാവായും വിജയ് കുമാര് സിന്ഹയെ ഉപനേതാവായും തെരഞ്ഞെടുത്തു.
