തിരുവനന്തപുരം : തദ്ദേശ തെരഞ്ഞെടുപ്പിലെ ബി ജെ പി മുന്നേറ്റം തടയാന്‍ സി പി എം വ്യാജവാര്‍ത്തകളുടെ കെട്ടഴിച്ചു വിടുകയാണെന്ന് ബി ജെ പി സംസ്ഥാന ജനറല്‍ സെക്രട്ടറി എസ് സുരേഷ്. ദേശാഭിമാനിയെയും കൈരളി ചാനലിനെയും ഉപയോഗിച്ചാണ് കളള പ്രചാരണം. സഹകരണ ബാങ്കില്‍ നിന്നും വായ്പ എടുത്ത് താന്‍ മുങ്ങിയെന്നും ബിജെപി സംസ്ഥാന ട്രഷററായ ഇ.കൃഷ്ണദാസിനെ നഗരസഭാ തെരഞ്ഞെടുപ്പില്‍ പരാജയപ്പെടുത്താന്‍ പാലക്കാട് നഗരസഭയിലെ മറ്റു ബിജെപി നേതാക്കള്‍ തീരുമാനിച്ചു എന്നതുമാണ് ‘വ്യാജവാര്‍ത്താ സ്പെഷ്യലിസ്റ്റുകളുടെ’ ഇന്നത്തെ കണ്ടുപിടുത്തം.
2016 ജൂലായ് 26 ന് തന്നെ പെരിങ്ങമല ലേബര്‍ കോണ്‍ട്രാക്ട് സഹകരണ സംഘം ഭരണസമിതി അംഗമെന്ന സ്ഥാനത്തു നിന്ന് താന്‍ രാജി വച്ചിരുന്നുവെന്ന് എസ് സുരേഷ് സാമൂഹ്യമാധ്യമത്തിലൂടെ അറിയിച്ചു.ഒരു വായ്‌പയോ ഒരു ചിട്ടിയോ ഏതെങ്കിലും ഒരു വായ്‌പയ്‌ക്ക് വേണ്ടിയുള്ള ശുപാര്‍ശയോ ആ സഹകരണ സംഘത്തില്‍ താന്‍ നടത്തിയതായി സഹകരണ വകുപ്പ് അന്വേഷണം റിപ്പോര്‍ട്ടില്‍ പോലും പറയുന്നില്ല.2023- 24 കാലഘട്ടത്തിലെ അന്വേഷണ റിപ്പോര്‍ട്ടാണ് പുതിയ കണ്ടുപിടുത്തമായി രാഷ്‌ട്രീയ ലക്ഷ്യത്തോടെ ദേശാഭിമാനിയും കൈരളിയും തനിക്കെതിരെ ഉന്നയിച്ചിരിക്കുന്നത്. ഈ റിപ്പോര്‍ട്ടിന്മേലുള്ള നടപടികള്‍ ഹൈക്കോടതി ജനുവരി ആറിന് സ്റ്റേ ചെയ്തിട്ടുണ്ട്.
വസ്തുതാ വിരുദ്ധവും മനപ്പൂര്‍വം അധിക്ഷേപിക്കാനും ഇടയാകുന്ന വിധത്തില്‍ വാര്‍ത്തകള്‍ പ്രചരിപ്പിക്കുന്ന സി പി എം മാധ്യമങ്ങള്‍ക്കെതിരെ നിയമനടപടി ആരംഭിച്ചിട്ടുണ്ടെന്നും സുരേഷ് അറിയിച്ചു.ശബരിമല സ്വര്‍ണക്കൊള്ള അടക്കം നിരവധി വിഷയങ്ങളിലെ തിരിച്ചടി മറികടക്കാന്‍ ദേശാഭിമാനിയിലെയും കൈരളിയിലേയും മാധ്യമപ്രവര്‍ത്തകരെക്കൊണ്ട് ഓവര്‍ ടൈം പണിയെടുപ്പിച്ച് നുണയെഴുതിക്കുന്ന പതിവു പരിപാടി ഇത്തവണ വിജയിക്കില്ലെന്ന് സി പി എം നേതൃത്വം മനസിലാക്കണമെന്നും അദ്ദേഹം കുറിച്ചു.
