ബീഹാർ ജനത ജാതിരാഷ്‌ട്രീയത്തെ തള്ളിക്കളഞ്ഞു, ഇത് പുതിയ ചരിത്രമാണ്, രാജ്യത്തിന് പാഠമാണ്: മോദി

സൂറത്ത്: ബീഹാർ ജനത ഈ തെരഞ്ഞെടുപ്പിൽ ജാതീയതയെ തള്ളിക്കളഞ്ഞുവെന്ന് പ്രധാനമന്ത്രി നരേന്ദ്രമോദി വിശദീകരിച്ചു. ഗുജറാത്തിൽ വിവിധ യോഗങ്ങളിൽ സംസാരിക്കുകയായിരുന്നു അദ്ദേഹം.
കുറ്റകൃത്യത്തിന് പിടിയിലായ ചില നേതാക്കൾ ജാമ്യത്തിലിറങ്ങി, രാഷ്‌ട്രീയ നേട്ടത്തിനു വേണ്ടി തെരഞ്ഞെടുപ്പിൽ ജയിക്കാൻ ബീഹാറിൽ ജാതീയതയെക്കുറിച്ച് പ്രസംഗങ്ങൾ നടത്തിക്കൊണ്ടിരുന്നു. ജാതീയതയുടെ വിഷം പരത്താൻ അവർ അവർക്കുള്ള അധികാരം മുഴുവൻ ഉപയോഗിച്ചു. ഇത് തങ്ങൾക്ക് സഹായകരമാകുമെന്ന് അവർ വളരെക്കാലമായി വിശ്വസിച്ചിരുന്നു. ബീഹാറിലെ ഈ തെരഞ്ഞെടുപ്പ് ജാതീയതയുടെ വിഷത്തെ പൂർണ്ണമായും നിരസിച്ചു. ഇത് രാജ്യത്തിന് വളരെ പ്രതീക്ഷ നൽകുന്ന സൂചനയാണ്, മോദി പറഞ്ഞു. അഴിമതിക്കേസിൽ ജാമ്യം നേടി പുറത്തിറങ്ങിയ ലല്ലു പ്രസാദ് യാദവിനെയും നാഷണൽ ഹെറാൾഡ് പത്രക്കേസിൽ ജാമ്യമെടുത്തു നടക്കുന്ന രാഹുൽ ഗാന്ധിയേയും പേരു പറയാതെ മോദി വിമർശിച്ചു.
കഴിഞ്ഞ രണ്ടോ മൂന്നോ വർഷമായി ബീഹാർ നിയമസഭയിലെ രംഗങ്ങൾ നിങ്ങൾ കണ്ടിട്ടുണ്ടാകും. നിതീഷ് കുമാറിനെ അപമാനിക്കുന്നത് ഫാഷനായി മാറിയതും അതിന് അശ്ലീലഭാഷ ഉപയോഗിക്കുന്നതും ശ്രദ്ധിച്ചിട്ടുണ്ടാകും. പാർലമെന്റിലെ മറ്റൊരു ‘പ്രമുഖൻ’ പാർലമെന്റിന്റെ മാന്യതയെ ലംഘിക്കുന്ന അതേ രീതിയാണ് പാറ്റനയിലും സംഭവിച്ചത്. രാജ്യത്തെ ജനങ്ങൾക്ക് ഇതൊന്നും അംഗീകരിക്കാൻ കഴിഞ്ഞില്ല, ബീഹാറിലെ ജനങ്ങൾക്ക് തീരെക്കഴിഞ്ഞില്ല. ഈ തെരഞ്ഞെടുപ്പിൽ അക്കൂട്ടരോട് വോട്ടർമാർ കടുത്ത വെറുപ്പു കാണിക്കാൻ ഒരു കാരണം അതാണ്,
|t നരേന്ദ്ര മോദി പറഞ്ഞു.
ബീഹാറിൽ, ചിലർ പലരുടെയും ഭൂമി നിയമവിരുദ്ധമായി കൈവശപ്പെടുത്തുകയും വീടുകൾ പിടിച്ചെടുക്കുകയും ചെയ്ത് അവ വഖഫ് സ്വത്തുക്കളാക്കി മാറ്റുകയും ചെയ്തു. തമിഴ്നാട്ടിൽ ആയിരക്കണക്കിന് വർഷം പഴക്കമുള്ള ഗ്രാമങ്ങൾ വഖഫ് സ്വത്തുക്കളാക്കി മാറ്റിയത് നമ്മൾ കണ്ടു… അതിനുശേഷം മാത്രമാണ് വഖഫ് സംബന്ധിച്ച് പാർലമെന്റിൽ ഒരു നിയമം കേന്ദ്ര സർക്കാർ പാസാക്കിയത്. എന്നാൽ, ബീഹാർ തെരഞ്ഞെടുപ്പു പ്രചാരത്തിനിടെ, ഈ ‘ജാമ്യത്തിലിറങ്ങിയ’വരും ‘പ്രമുഖ’രും അവരുടെ സഖ്യകക്ഷികളും വഖഫ് നിയമം പരസ്യമായി കീറിക്കളഞ്ഞു, അവർ വിജയിച്ചാൽ വഖഫ് നിയമം നടപ്പാക്കാൻ അനുവദിക്കില്ലെന്ന് പ്രഖ്യാപിച്ചു. വികസനത്തിന്റെ പാത പിന്തുടർന്ന് ബീഹാറിലെ ജനങ്ങൾ ഈ വർഗീയ വിഷത്തെ പൂർണ്ണമായും നിരസിച്ചു.
ബീഹാർ തെരഞ്ഞെടുപ്പിൽ എൻഡിഎ നേടിയ വൻ വിജയത്തെക്കുറിച്ച് പ്രധാനമന്ത്രി നരേന്ദ്ര മോദി തുടർന്നു: ‘ബീഹാർ ഇന്ന് ലോകമെമ്പാടും പ്രശസ്തമാണ്. ലോകത്തെവിടെയും പോയാലും നിങ്ങൾക്ക് ബീഹാറിന്റെ കഴിവുകൾ കണ്ടെത്താൻ കഴിയും. വികസനത്തിൽ പുതിയ ഉയരങ്ങളിലെത്താനുള്ള സന്നദ്ധത ബീഹാർ ഇപ്പോൾ പ്രകടിപ്പിക്കുന്നുണ്ട്. ഈ തെരഞ്ഞെടുപ്പ് ആ സന്നദ്ധതയെ പ്രതിഫലിപ്പിച്ചു. വരും ദശകങ്ങളിൽ രാഷ്‌ട്രീയത്തിന്റെ അടിത്തറ ശക്തിപ്പെടുത്തുന്ന ഒരു കൂട്ടായ്‌മയാണ് ബീഹാറിലെ സ്ത്രീകളും യുവാക്കളും രൂപപ്പെടുത്തിയത്. രാഷ്‌ട്രീയം വിശകലനം ചെയ്യുന്നവർക്ക് ബീഹാറിലെ തെരഞ്ഞെടുപ്പ് ഫലങ്ങളുടെ പ്രത്യാഘാതങ്ങൾ വിശകലനം ചെയ്യാൻ മാസങ്ങൾ എടുക്കും.
ഈ തെരഞ്ഞെടുപ്പിൽ, വിജയിച്ച എൻഡിഎ സഖ്യവും പരാജയപ്പെട്ട മഹാഗഢ്ബന്ധനും തമ്മിൽ 10% വോട്ട് വ്യത്യാസമുണ്ട്. ഇത് ഗണ്യമായതാണ്. അതായത് വോട്ടർമാർ വികസനത്തിന് വോട്ടുചെയ്തു. ബീഹാറിന്റെ വികസനത്തിനായുള്ള ആഗ്രഹം ഇന്ന് വ്യക്തമാണ്. ബീഹാർ ഒരു ചരിത്ര വിജയമാണ് നേടിയത്. ബീഹാറിലെ ജനങ്ങളെ കാണാതെ നമ്മൾ സൂറത്ത് വിട്ടാൽ, ഞങ്ങളുടെ യാത്ര അപൂർണ്ണമാണെന്ന് തോന്നുന്നു. അതിനാൽ, ഗുജറാത്തിൽ, പ്രത്യേകിച്ച് സൂറത്തിൽ താമസിക്കുന്ന എന്റെ ബീഹാറി സഹോദരങ്ങൾക്ക് അഭിനന്ദനങ്ങൾ, മോദി പറഞ്ഞു.