മുംബൈ: ഇക്കാലത്ത് കുട്ടികളെ വളര്‍ത്തുന്നതില്‍ എന്തോ ഗുരുതരമായ തെറ്റു സംഭവിക്കുന്നുണ്ടെന്ന് ബോംബെ ഹൈക്കോടതി ആശങ്കപ്പെട്ടു. ചികിത്സയുമായി ബന്ധപ്പെട്ട സന്ദര്‍ശനങ്ങള്‍ക്കിടെ പടിഞ്ഞാറന്‍ പ്രാന്തപ്രദേശത്തെ തന്റെ വീട്ടില്‍ വന്നു താമസിക്കുന്നതില്‍ നിന്ന് കോലാപ്പൂരില്‍ താമസിക്കുന്ന മാതാപിതാക്കളെ വിലക്കണമെന്ന് ആവശ്യപ്പെട്ട് മകന്‍ സമര്‍പ്പിച്ച ഹര്‍ജിയിലാണ് ബോംബെ ഹൈക്കോടതി ഈ ആശങ്ക പങ്കുവച്ചത്. മാതാപിതാക്കള്‍ക്ക് ഒരു അസൗകര്യവും ഉണ്ടാകുന്നില്ലെന്നും അവരോട് ബഹുമാനത്തോടെയും സ്‌നേഹത്തോടെയും കരുതലോടെയും പെരുമാറുന്നുണ്ടെന്നും ഉറപ്പാക്കാന്‍ കോടതി നിര്‍ദ്ദേശിച്ചു.
‘രോഗികളും വൃദ്ധരുമായ മാതാപിതാക്കളെ പരിചരിക്കാനുള്ള ധാര്‍മ്മിക കടമ നിറവേറ്റുന്നതിനുപകരം ഒരു മകന്‍ അവര്‍ വീട്ടില്‍ കയറുന്നത് വിലക്കണമെന്ന ഉത്തരവ് തേടി കോടതിയിലെത്തിയത് ദുഃഖകരമാണ്. നമ്മുടെ ധാര്‍മ്മിക മൂല്യങ്ങള്‍ അത്രത്തോളം അധഃപതിച്ചിരിക്കുന്നു. ജസ്റ്റിസ് ജെയിന്‍ ചൂണ്ടിക്കാട്ടി.
മാതാപിതാക്കള്‍ക്ക് പത്ത് കുട്ടികളെ പരിപാലിക്കാന്‍ കഴിയുന്നുണ്ട്. എന്നാല്‍ ആ പത്ത് കുട്ടികള്‍ക്ക് അവരുടെ രണ്ടു മാതാപിതാക്കളെ പരിപാലിക്കാന്‍ കഴിയില്ലെന്നത് വേദനാജനകമായ യാഥാര്‍ത്ഥ്യമാണ്. കോടതി നിരീക്ഷിച്ചു.
