ശ്രീനഗര്‍: ദല്‍ഹിയിലെ സ്‌ഫോടനത്തിന്റെ പശ്ചാത്തലത്തില്‍ ജമ്മു കശ്മീരില്‍ വ്യാപക തെരച്ചില്‍. നിരോധിത ജമാഅത്തെ ഇസ്ലാമിയുമായി (ജെഇഐ) ബന്ധപ്പെട്ട് കശ്മീര്‍ പോലീസ് ഓപ്പറേഷന്‍ ആരംഭിച്ചു. കുല്‍ഗാം ജില്ലയില്‍ മാത്രം 200ലധികം സ്ഥലങ്ങളിലാണ് പോലീസ് തെരച്ചില്‍ നടത്തിയത്. വരും ദിവസങ്ങളിലും തുടരും.
കഴിഞ്ഞ നാല് ദിവസത്തിനുള്ളില്‍ അനന്ത്‌നാഗ് ജില്ലയില്‍ 500ലധികം പേരെ ജെഇഐയുമായി ബന്ധപ്പെട്ട് ചോദ്യം ചെയ്തു. ഇതില്‍ ചിലരുടെ അറസ്റ്റ് രേഖപ്പെടുത്തി കരുതല്‍ തടങ്കലില്‍ പാര്‍പ്പിച്ചിരിക്കുകയാണ്. തെരച്ചിലില്‍ ജെഇഐയുമായി ബന്ധപ്പെട്ട രേഖകളും മൊബൈല്‍ ഫോണുകളും മറ്റ് ഡിജിറ്റല്‍ ഉപകരണങ്ങളും പിടിച്ചെടുത്തിട്ടുണ്ട്.
കുല്‍ഗാം ജില്ലയില്‍ 400 കോര്‍ഡണ്‍ ആന്‍ഡ് സെര്‍ച്ച് ഓപ്പറേഷനുകളും (സിഎഎസ്ഒ) ആരംഭിച്ചു. 2019ലാണ് കേന്ദ്ര സര്‍ക്കാര്‍ ജെഇഐയെ നിരോധിക്കുന്നത്. തുടര്‍ന്ന് അതിന്റെ നേതാക്കളെ അറസ്റ്റ് ചെയ്ത് ജയിലിലടക്കുകയും ചെയ്തിരുന്നു. ഭീകരതയെ താഴെത്തട്ടില്‍ നിന്ന് ഇല്ലാതാക്കുന്നതിനുള്ള ശ്രമങ്ങളുടെ ഭാഗമായാണ് കഴിഞ്ഞ ദിവസങ്ങളില്‍ സംസ്ഥാനത്ത് വ്യാപകമായി തെരച്ചില്‍ നടത്തിയതെന്ന് പോലീസ് വക്താവ് അറിയിച്ചു.
ഷോപ്പിയാനിലും ജെഇഐ പ്രവര്‍ത്തകരെ ലക്ഷ്യമിട്ട് സമാന പരിശോധനകള്‍ നടന്നിട്ടുണ്ട്. ദല്‍ഹി സ്‌ഫോടനങ്ങളെത്തുടര്‍ന്ന് ജമ്മു കശ്മീരിലുടനീളം സുരക്ഷ ശക്തമാക്കിയിട്ടുണ്ട്, വാഹന പരിശോധനകളും തെരച്ചില്‍ പ്രവര്‍ത്തനങ്ങളും ശക്തമാക്കിയിട്ടുണ്ട്.
