AI ലോകം അനുദിനം മാറിക്കൊണ്ടിരിക്കുന്നു. ഇത് സാങ്കേതികവിദ്യ എത്രത്തോളം പുരോഗമിക്കുന്നു എന്നതിന്റെ തെളിവാണ്. എലോൺ മസ്ക് വികസിപ്പിച്ചെടുത്ത AI ചാറ്റ്ബോട്ട് ഗ്രോക്ക് ഇന്ന് എല്ലാവർക്കും അറിയാം . ഇന്ന് ഇപ്പോൾ ഗ്രോക്ക് എലോൺ മസ്കിന് മഹാഗണപതിയെ പറ്റി നൽകിയ വിവരങ്ങളാണ് സോഷ്യൽ മീഡിയയിൽ ട്രെൻഡാകുന്നത്.
ചാറ്റ്ബോട്ട് ഗ്രോക്കിന്റെ ഇമേജ് റെക്കഗ്നിഷൻ കഴിവുകൾ പരീക്ഷിക്കാനാണ് മസ്ക് ഗണപതിയുടെ ചിത്രം അപ്ലോഡ് ചെയ്തത്. അതിനുശേഷം, മസ്ക് ചാറ്റ്ബോട്ട് ഗ്രോക്കിനോട് ഇതിനെക്കുറിച്ച് വിശദാംശങ്ങൾ ചോദിച്ചു . അതിന് ഗ്രോക്ക് വിശദമായ ഉത്തരം നൽകുകയും ചെയ്തു . ഈ സംഭാഷണത്തിന്റെ സ്ക്രീൻഷോട്ടും മസ്ക് പങ്ക് വച്ചു.
പരമ്പരാഗത പിച്ചള ഗണേശ വിഗ്രഹത്തിന്റെ ഫോട്ടോ അപ്ലോഡ് ചെയ്ത് “ഇത് എന്താണ്?” എന്നാണ് മസ്ക് ചോദിച്ചത് . പിന്നാലെ ചാറ്റ്ബോട്ട് വിഗ്രഹത്തെ തിരിച്ചറിയുകയും ഗണേശനെക്കുറിച്ചുള്ള വിശദമായ വിവരങ്ങൾ നൽകുകയും ചെയ്തു.
ഇന്ത്യക്കാർ ആരാധിക്കുന്ന ഹിന്ദു ദൈവമായ ഗണേശന്റെ ഒരു ചെറിയ പിച്ചള പ്രതിമയാണിത്. ആനയുടെ തല, നാല് കൈകൾ, ഇരിക്കുന്ന ഭാവം, കാൽക്കൽ വാഹനമായ എലി എന്നിങ്ങനെ വിഗ്രഹത്തിന്റെ പ്രധാന സവിശേഷതകളും ചാറ്റ്ബോട്ട് വിവരിച്ചു.
മാത്രമല്ല തടസ്സങ്ങൾ നീക്കുന്നവനാണ് ഗണപതി . തുടക്കത്തിന്റെയും ജ്ഞാനത്തിന്റെയും സമൃദ്ധിയുടെയും ദേവനായാണ് അദ്ദേഹം അറിയപ്പെടുന്നത്. പൂജാമുറികളിൽ ദൈനംദിന ആരാധനയ്ക്കായി ഈ വിഗ്രഹങ്ങൾ സാധാരണയായി ഉപയോഗിക്കുന്നു. പരമ്പരാഗത ദക്ഷിണേന്ത്യൻ ശൈലിയിലുള്ള ഒരു പിച്ചള വിഗ്രഹം പോലെയാണ് ഇത് കാണപ്പെടുന്നത്. ചുവന്ന പശ്ചാത്തലമുള്ള മര പീഠത്തിലാണ് ഇത് സ്ഥാപിച്ചിരിക്കുന്നതെന്നും ചാറ്റ് ബോട്ട് മസ്കിനോട് പറഞ്ഞു.
നവംബർ 11 ന് പങ്കിട്ട പോസ്റ്റ് 11.1 ദശലക്ഷത്തിലധികം പേർ ഇതുവരെ കണ്ടു. പോസ്റ്റ് ഇന്ത്യക്കാരുടെ ഹൃദയം കീഴടക്കിയെന്നാണ് കമന്റുകൾ. മസ്ക് ഹിന്ദു പാരമ്പര്യത്തിൽ താൽപ്പര്യം കാണിക്കുന്നത് കാണാൻ സന്തോഷമുണ്ടെന്നും ചിലർ പറഞ്ഞു.
