ന്യൂദൽഹി : ചെങ്കോട്ടയ്‌ക്ക് സമീപം നടന്നത് ആസൂത്രിത ആക്രമണമാണെന്ന് സംശയം . ഹരിയാനയിലെ ഫരീദാബാദില്‍ നിന്നും വലിയ അളവില്‍ സ്‌ഫോടകവസ്തുക്കള്‍ പിടിച്ചെടുത്ത സംഭവത്തിനു പിന്നാലെയാണ് ഡൽഹിയിൽ സ്ഫോടനം നടന്നത്. ഡല്‍ഹിയില്‍ നിന്ന് ഏതാനും കിലോമീറ്റര്‍ മാത്രം അകലെയുള്ള ഫരീദാബാദില്‍ നിന്നും വലിയ അളവിലാണ് സ്‌ഫോടക വ്‌സതുക്കള്‍ പിടിച്ചെടുത്തത്.
കാറിന്റെ പിൻഭാഗത്താണ് സ്ഫോടനം ഉണ്ടായത്. സംഭവസ്ഥലത്ത് ഗർത്തങ്ങളൊന്നും ഉണ്ടായിരുന്നില്ല. പരിക്കേറ്റവരുടെ ശരീരത്തിൽ ആണികളോ വയറുകളോ തുളച്ചുകയറിയിട്ടില്ല. തകർന്ന ഭാഗങ്ങളിൽ നിന്ന് വാഹനത്തിന്റെ നമ്പർ തിരിച്ചറിയാൻ ഡൽഹി സ്പെഷ്യൽ സെൽ സംഘവും ഫോറൻസിക് വിദഗ്ധരും ചേർന്ന് പ്രവർത്തിക്കുന്നുണ്ട് .
ഡൽഹി പോലീസ് വൃത്തങ്ങൾ പറയുന്നതനുസരിച്ച്, ചെങ്കോട്ട സ്ഫോടനത്തിന്റെ ആഘാതം 200 മീറ്റർ വരെ നീണ്ടു. ആളുകൾ ഛിന്നഭിന്നമായി. പ്രാഥമിക അന്വേഷണങ്ങൾ സൂചിപ്പിക്കുന്നത് ഇതൊരു വലിയ തീവ്രവാദ ആക്രമണമാണെന്നാണ്.സ്ഫോടനം പ്രദേശമാകെ പരിഭ്രാന്തി പരത്തി. കാറിന് തീ പടർന്നു, സമീപത്തുള്ള മൂന്നോ നാലോ വാഹനങ്ങളെ വിഴുങ്ങുന്ന തരത്തിൽ അത് ശക്തമായി പടർന്നു.സ്ഫോടനത്തിൽ സമീപത്തെ കടകളുടെ ജനാലകൾ തകർന്നു
ചെങ്കോട്ട മെട്രോ സ്റ്റേഷന് സമീപമുണ്ടായ സ്ഫോടനത്തെത്തുടർന്ന്, വിമാനത്താവളങ്ങൾ, ഡൽഹി മെട്രോ, പൈതൃക സ്ഥലങ്ങൾ, സർക്കാർ കെട്ടിടങ്ങൾ, സുരക്ഷാ പരിധിക്കുള്ളിലെ മറ്റ് പ്രധാന സ്ഥാപനങ്ങൾ എന്നിവയുൾപ്പെടെ രാജ്യമെമ്പാടും സിഐഎസ്എഫ് അതീവ ജാഗ്രതാ നിർദ്ദേശം നൽകിയിട്ടുണ്ട്. ഭീകരാക്രമണ സാധ്യതയെക്കുറിച്ച് ദേശീയ അന്വേഷണ ഏജൻസി (എൻഐഎ) അന്വേഷണം ആരംഭിച്ചിട്ടുണ്ട്. എൻഐഎ, എൻഎസ്ജി സംഘങ്ങളും സ്ഥലത്തുണ്ട്.
