കോഴിക്കോട് : ജനകീയ പ്രതിഷേധത്തെ തുടര്‍ന്ന് പ്രവര്‍ത്തനം നിര്‍ത്തി വച്ച താമരശേരി കട്ടിപ്പാറയിലെ ഫ്രഷ് കട്ട് അറവ് മാലിന്യസംസ്‌കരണ പ്ലാന്റ് വീണ്ടും തുറന്നു. ഹൈക്കോടതി ഉത്തരവ് പ്രകാരം പൊലീസ് സംരക്ഷണത്തോടെയാണ് തുറന്നത്. പൂര്‍ണമായും പ്രവര്‍ത്തനം തുടങ്ങിയെന്ന് ഫ്രഷ് കട്ട് മാനേജിംഗ് ഡയറക്ടര്‍ സുജീഷ് കോലോത്ത്തൊടി അറിയിച്ചു.
അതേസമയം അറവ് മാലിന്യ പ്ലാന്റ്റിനെതിരെ സമരം ശക്തമാക്കുമെന്ന് ജനകീയ സമരസമിതി പറഞ്ഞു.കഴിഞ്ഞമാസം 21നാണ്് പ്ലാന്റിനെതിരെ ജനകീയ പ്രതിഷേധം ഉണ്ടായത്. ഫാക്ടറിക്ക് തീയിടുന്നതുള്‍പ്പടെ വലിയ സംഘര്‍ഷം ഉണ്ടായി. പിന്നാലെ പ്ലാന്റ് അടച്ചു. പ്ലാന്റ് അധികൃതര്‍ ഹൈക്കോടതിയെ സമീപിച്ചാണ് പൊലീസ് സുരക്ഷയില്‍ പ്ലാന്റ് തുറക്കാന്‍ അനുമതി വാങ്ങിയത്.
അതേസമയം തങ്ങള്‍ ശുദ്ധ വായുവിനും വെളളത്തിനും വേണ്ടിയാണ് സമരം ചെയ്യുന്നതെന്ന് സ്ത്രീകളടക്കം സമരസമിതി പ്രവര്‍ത്തകര്‍ പറഞ്ഞു.
