പത്തനംതിട്ട: ശബരിമല മണ്ഡല മകരവിളക്ക് തീര്‍ത്ഥാടനത്തിന്റെ ഭാഗമായുള്ള മുന്നൊരുക്കങ്ങള്‍ പമ്പയിലും സന്നിധാനത്തും പുരോഗമിക്കുന്നു. കഴിഞ്ഞ മാസം രാഷ്‌ട്രപതി ദ്രൗപതി മുര്‍മുവിന്റെ സന്ദര്‍ശനവുമായി ബന്ധപ്പെട്ട് സന്നിധാനത്ത് പുനരുദ്ധാരണ പ്രവര്‍ത്തനങ്ങള്‍ നടത്തിയിരുന്നു. ഇതിന്റെ ബാക്കിയായാണ് മണ്ഡലകാല മുന്നൊരുക്കങ്ങള്‍ നടക്കുന്നത്. ഭക്തര്‍ക്കായുള്ള വെര്‍ച്വല്‍ ക്യൂ ബുക്കിങ് നവംബര്‍ ഒന്നിന് വൈകിട്ട് അഞ്ചുമണി മുതല്‍ ആരംഭിച്ചിരുന്നു.
sabarimalaonline.orgഎന്ന വെബ്സൈറ്റിലാണ് ദര്‍ശനത്തിനു സ്ലോട്ട് ബുക്ക് ചെയ്യേണ്ടത്. ദിവസം 70,000 ഭക്തര്‍ക്കാണ് സ്ലോട്ട് ബുക്ക് ചെയ്യാവുക. വണ്ടിപ്പെരിയാര്‍ സത്രം, എരുമേലി, നിലയ്‌ക്കല്‍, പമ്പ എന്നിവിടങ്ങളില്‍ റിയല്‍ ടൈം ബുക്കിങ് കേന്ദ്രങ്ങളും ഉണ്ടാകും. ദിവസം പരമാവധി 20,000 പേര്‍ക്കാണ് റിയല്‍ ടൈം ബുക്കിംഗ് വഴി ദര്‍ശനം അനുവദിക്കുക.
തീര്‍ഥാടകര്‍ക്കുള്ള അപകട ഇന്‍ഷുറന്‍സ് പരിരക്ഷ കഴിഞ്ഞ വര്‍ഷം നാലു ജില്ലകളില്‍ നടക്കുന്ന അപകട മരണങ്ങള്‍ക്ക് മാത്രമായിരുന്നു. ഈ തീര്‍ത്ഥാടനകാലം മുതല്‍ കേരളത്തില്‍ എവിടെയും ശബരിമല യാത്രാമധ്യേ അപകടമുണ്ടായാലും അഞ്ചു ലക്ഷം രൂപ ലഭിക്കുന്ന തരത്തില്‍ പരിരക്ഷ വ്യാപിപ്പിച്ചിട്ടുണ്ട്. മൃതശരീരം നാട്ടില്‍ എത്തിക്കാന്‍ കേരളത്തിനകത്ത് 30,000 രൂപ വരെയും കേരളത്തിന് പുറത്തേക്ക് ഒരു ലക്ഷം വരെയും ആംബുലന്‍സ് ചെലവായും ലഭിക്കും.
ഈ വര്‍ഷം മുതല്‍ ഇന്‍ഷുറന്‍സ് പരിരക്ഷ ശബരിമല ഡ്യൂട്ടി നോക്കുന്ന ദേവസ്വം ബോര്‍ഡ് സ്ഥിരം, ദിവസവേതന ജീവനക്കാര്‍ക്കും മറ്റു വകുപ്പുകളിലെ ജീവനക്കാര്‍ക്കും ലഭ്യമാക്കും.
നിലയ്‌ക്കല്‍ മുതല്‍ സന്നിധാനം വരെ തീര്‍ഥാടന പാതയില്‍ ഭക്തര്‍ക്കുണ്ടാകുന്ന ഹൃദയാഘാതം, പക്ഷാഘാതം തുടങ്ങിയ അസുഖങ്ങള്‍ മൂലം സ്വാഭാവിക മരണം സംഭവിക്കുന്നവര്‍ക്ക് നഷ്ട്ടപരിഹാരം ഉണ്ടായിരുന്നില്ല. ഈ വര്‍ഷം മുതല്‍ അസുഖം മൂലം സ്വഭാവിക മരണം സംഭവിക്കുന്നവര്‍ക്ക് മൂന്നു ലക്ഷം രൂപ ധനസഹായം ലഭ്യമാകുന്ന പില്‍ഗ്രിം വെല്‍ഫയര്‍ നിധിയും തുടങ്ങും.
ഇന്‍ഷുറന്‍സ് പരിരക്ഷ ലഭിക്കുന്നതിന് അടിസ്ഥാന രേഖയായി പരിഗണിക്കുന്നത് ഓണ്‍ലൈന്‍ വെര്‍ച്വല്‍ ക്യൂ ബുക്കിങ് ഐഡി ആയതിനാല്‍ പരമാവധി ഭക്തര്‍ ഓണ്‍ലൈന്‍ ബുക്കിങ് പ്രയോജനപ്പെടുത്തണമെന്ന് ദേവസ്വം ബോര്‍ഡ് അറിയിച്ചു.
