തിരുവനന്തപുരം: കേരളത്തില് വോട്ടര് പട്ടികയുടെ തീവ്ര പരിശോധന (എസ് ഐ ആര്) നടപ്പാക്കുന്നത് നിയമപരമായി ചോദ്യം ചെയ്യാന് സംസ്ഥാനത്തെ ഇടതു പക്ഷ സര്ക്കാര്. മുഖ്യമന്ത്രി പിണറായി വിജയന്റെ അധ്യക്ഷതയില് ചേര്ന്ന സര്വ കക്ഷി യോഗത്തില് ബിജെപിയുടെ കടുത്ത വിയോജിപ്പ് മറികടന്നാണ് ഈ തീരുമാനം. കോണ്ഗ്രസ് അടക്കമുള്ള മറ്റു കക്ഷികള് പിണറായി സര്ക്കാരിന്റെ തീരുമാനത്തെ പൂര്ണമായും പിന്തുണച്ചു. തദ്ദേശ സ്വയംഭരണ സ്ഥാപന തെരഞ്ഞെടുപ്പ് അടുത്തിരിക്കുന്ന പശ്ചാത്തലത്തില് എസ്ഐആര് ചോദ്യം ചെയ്യാനുള്ള നിയമോപദേശം സര്ക്കാര് എന്ന നിലയിലും രാഷ്ട്രീയ പാര്ട്ടി എന്ന നിലയിലും തേടുമെന്നും മുഖ്യമന്ത്രി യോഗത്തെ അറിയിച്ചു.
കോടതിയില് പോയാല് കക്ഷിചേരാന് തയ്യാറാണെന്നും പ്രതിപക്ഷ നേതാവ് വി ഡി സതീശന് പറഞ്ഞു. ഭരണഘടനാ വിരുദ്ധവും ജനാധിപത്യ വിരുദ്ധവുമായ നടപടിയാണ് ഇതെന്ന് സിപിഎം സംസ്ഥാന സെക്രട്ടറി എം വി ഗോവിന്ദന് പറഞ്ഞു.
കെ സുരേന്ദ്രന് (ബിജെപി), പി സി വിഷ്ണുനാഥ് (കോണ്ഗ്രസ് ഐ), സത്യന് മൊകേരി (സിപിഐ), പി കെ കുഞ്ഞാലിക്കുട്ടി (ഐയുഎംഎല്), സ്റ്റീഫന് ജോര്ജ് (കേരള കോണ്ഗ്രസ് എം), പി ജെ ജോസഫ് (കേരള കോണ്ഗ്രസ്), മാത്യു ടി തോമസ് (ജനതാദള് സെക്യുലര്), തോമസ് കെ തോമസ് (എന്സിപി), ഉഴമലയ്ക്കല് വേണുഗോപാല് (കോണ്ഗ്രസ് എസ്), കെ ജി പ്രേംജിത്ത് (കേരള കോണ്ഗ്രസ് ബി), അഡ്വ. ഷാജ ജി എസ് പണിക്കര് (ആര്എസ്പി ലെനിനിസ്റ്റ്) കെ ആര് ഗിരിജന് (കേരള കോണ്ഗ്രസ് ജേക്കബ്), എന് കെ പ്രേമചന്ദ്രന് (ആര്എസ്പി), അഹമ്മദ് ദേവര്കോവില് (ഐഎന്എല്), ആന്റണി രാജു (ജനാധിപത്യ കേരള കോണ്ഗ്രസ്) എന്നിവര് സംസാരിച്ചു.
