ന്യൂദല്ഹി:ദല്ഹിയിലെ വായുമലിനീകരണം കറയ്ക്കാന് കൃത്രിമമഴ പരീക്ഷിച്ച് തലസ്ഥാനനഗരി. ദല്ഹിയില് ഇത്തരമൊരു പരീക്ഷണം നടത്തുന്നത് ഇതാദ്യമായാണെന്നും മുഖ്യമന്ത്രി രേഖാ ഗുപ്ത.
ദല്ഹിയിലെ വായുമലിനീകരണം കുറയ്ക്കാന് സാധ്യമായ എല്ലാ പരീക്ഷണങ്ങളും നടത്തുകയാണ് ദല്ഹിയിലെ ബിജെപി സര്ക്കാര്. “വായുമലിനീകരണം തടയാന് ക്ലൗഡ് സീഡിംഗ് ആദ്യമായി പരീക്ഷിച്ചുനോക്കുകയാണ്. ആദ്യമായി നടത്തുന്ന ഈ പരീക്ഷണം ദല്ഹിയില് വിജയിക്കട്ടെ എന്ന് പ്രാര്ത്ഥിക്കുകയാണ്.”- രേഖാ ഗുപ്ത പറഞ്ഞു.
ബുരാരി, കരോള് ബാഗ്, ബോജ്പൂര്, മയൂര് വിഹാര് പ്രദേശങ്ങളിലാണ് ക്ലൗഡ് സീഡിംഗ് നടത്തിയത്. കാണ്പൂരില് നിന്നും വന്ന വിമാനമാണ് ക്ലൗഡ് സീഡിംഗ് നടത്തിയത്. എട്ട് ഫ്ളെയറുകളാണ് ഉപയോഗിച്ചത്. രണ്ടര കിലോ വരെയാണ് ഒരു ഫ്ലെയറിന്റെ ഭാരം. ഇത് മേഘങ്ങളില് വിതറുകയാണ് ചെയ്യുന്നത്. 15 ശതമാനം മുതല് 20 ശതമാനം വരെ ഈര്പ്പം മേഘങ്ങള്ക്ക് ഉണ്ടായിരുന്നതായി പറയുന്നു. മഴ പെയ്യുകയും ചെയ്തു. അത് ദല്ഹിയില് ഈ പ്രദേശങ്ങളിലെ വായുവിന്റെ ഗുണനിലവാരം മെച്ചപ്പെടുത്തിയതായി പറയുന്നു.
മഞ്ഞുകാലം വരുന്നതിന് മുന്പ് പരീക്ഷണാര്ത്ഥമാണ് കൃത്രിമ മഴ പെയ്യിച്ചത്. ഇത് വിജയകരമായതോടെ ഇനി മഞ്ഞുകാലത്ത് കൂടുതല് ക്ലൗഡ് സീഡിംഗ് നടത്താനാണ് പദ്ധതി.
