കൊച്ചി : സെന്‍സര്‍ ബോര്‍ഡ് കട്ടിനെതിരായ ഹര്‍ജിയില്‍ ഷെയ്ന്‍ നിഗം നായകനായ ‘ഹാല്‍’ എന്ന മലയാള സിനിമ ശനിയാഴ്ച വൈകുന്നേരം 7 മണിക്ക് കാണാന്‍ ഹൈക്കോടതി തീരുമാനിച്ചു. ബീഫ് ബിരിയാണി കഴിക്കുന്ന രംഗങ്ങള്‍, ബുര്‍ഖ ധരിച്ച നായികയുടെ നൃത്തരംഗം എന്നിവയുള്‍പ്പെടെ വിവിധ വെട്ടിച്ചുരുക്കലുകള്‍ നിര്‍ദ്ദേശിക്കുകയും ചിത്രത്തിന് എ സര്‍ട്ടിഫിക്കറ്റ് നല്‍കുകയും ചെയ്തതിനെതിരെ സംവിധായകനും നിര്‍മ്മാതാവും സമര്‍പ്പിച്ച ഹര്‍ജിയിലാണ് ജസ്റ്റിസ് വിജി അരുണിന്‌റെ തീരുമാനം.
കാക്കനാട്ട് എവിടെയെങ്കിലും വേണ്ട സജ്ജീകരണം നടത്താമെന്നും കൃത്യമായ സ്ഥലം ഉടന്‍ അറിയിക്കാമെന്നും ഹര്‍ജിക്കാരന്റെ അഭിഭാഷകന്‍ വ്യക്തമാക്കി. ജഡ്ജിക്കൊപ്പം എതിര്‍കക്ഷികള്‍ക്കും അവരുടെ അഭിഭാഷകര്‍ക്കും സിനിമ കാണാന്‍ അനുവാദമുണ്ട്.
വിഷയത്തില്‍ കോടതി കത്തോലിക്കാ കോണ്‍ഗ്രസിനെ ഹര്‍ജിയില്‍ കക്ഷി ചേര്‍ക്കാന്‍ അനുവദിച്ചിരുന്നു. താമരശ്ശേരി ബിഷപ്പിനെ വ്യത്യസ്ത മതവിഭാഗങ്ങള്‍ തമ്മിലുള്ള വിവാഹങ്ങളെ പ്രോത്സാഹിപ്പിക്കുന്ന ഒരാളായി ചിത്രീകരിച്ചിരിക്കുന്നതിനാല്‍, ചിത്രം ക്രിസ്ത്യാനികളുടെ മതവികാരം വ്രണപ്പെടുത്തുന്നതാണെന്ന് കത്തോലിക്കാ കോണ്‍ഗ്രസ് സത്യവാങ്മൂലത്തില്‍ പറഞ്ഞിരുന്നു.
