ബെംഗളൂരു: ആ രാക്ഷസനെ തൂക്കിലേറ്റിയാലും ഇരയുടെ ത്യാഗം വെറുതെയാകും…മുന് സഹപാഠിയുടെ ഉപദ്രവത്തിനും ഭീഷണിക്കും വിധേയയായി കുടക് സ്വദേശിനിയായ പി ജി വിദ്യാര്ത്ഥിനി സന പര്വിന് (19) ആത്മഹത്യ ചെയ്ത സംഭവത്തില് പ്രതിയായ മലയാളി റീഫാനെതിരെ സോഷ്യല് മീഡിയയിലടക്കം കര്ണ്ണാടകയില് പ്രതിഷേധം കനക്കുകയാണ്. ബെംഗളൂരുവിലും പരിസരപ്രദേശങ്ങളിലും ആവര്ത്തിക്കുന്ന ഇത്തരം ദുരന്തങ്ങള് കാമ്പസുകളിലും പുറത്തും യുവതികളുടെ സുരക്ഷയെക്കുറിച്ചുള്ള വലിയ ആശങ്കകളാണ് ഉയര്ത്തുന്നത്. ബെംഗളുരുവിലെ കോശീസ് ഗ്രൂപ്പ് ഓഫ് ഇന്സ്റ്റിറ്റിയൂഷനിലെ രണ്ടാം വര്ഷ വിദ്യാര്ത്ഥിനിയും കുടക് സ്വദേശിനിയുമായ സന പര്വിനെ വെള്ളിയാഴ്ചയാണ് രണ്ട് സഹപാഠികള്ക്കൊപ്പം വാടകയ്ക്ക് താമസിച്ചിരുന്ന വീട്ടില് തൂങ്ങിമരിച്ച നിലയില് കണ്ടെത്തിയത്. മരിക്കുന്നതിനു തൊട്ടു മുന്പും സീനിയറായി കോളേജില് പഠിച്ചിരുന്ന ചാവക്കാട് സ്വദേശി റീഫാന് ഭീഷണി പെടുത്തുന്നതായി വീട്ടുകാരെ വിളിച്ച് സന അറിയിച്ചിരുന്നു. പ്രണയാഭ്യര്ഥന തള്ളിയതിനെ തുടര്ന്നു റീഫാന് സനയെ നിരന്തരം പിന്തുടര്ന്നു ഭീഷണിപ്പെടുത്തുന്നുവെന്നായിരുന്നു പരാതി. സനയുടെ കുടുംബത്തിന്റെ പരാതിയില് കോളേജ് അധികൃതര് നേരത്തെ റീഫാനെ വിളിച്ചുവരുത്തി താക്കീത് ചെയ്തിരുന്നതാണ്. എന്നാല് അതോടെ ഭീഷണി വര്ദ്ധിച്ചതാണ് സനയെ ഈ കടുംകൈയ്ക്കു പ്രേരിപ്പിച്ചതെന്നാണ് അറിയുന്നത്.
ആത്മഹത്യാ പ്രേരണ, പീഡനം, ക്രിമിനല് ഭീഷണി എന്നീ കുറ്റങ്ങള് ചുമത്തി റീഫാനെതിരെ കേസെടുത്തിട്ടുണ്ട്. ‘പ്രതിയെ കണ്ടെത്താനും കസ്റ്റഡിയിലെടുക്കാനും ശ്രമം നടത്തുന്നുണ്ട്. കൂടുതല് അന്വേഷണം നടന്നുവരുന്നു’ എന്ന് ബെഗൂര് പോലീസ് പറഞ്ഞു.
