കാഠ്മണ്ഡു : നേപ്പാളിലെ യുവാക്കൾ നയിക്കുന്ന ജനറൽ ഇസഡ് ഗ്രൂപ്പ് , രാഷ്ട്രീയ പാർട്ടി രൂപീകരിക്കാനുള്ള പദ്ധതികൾ പ്രഖ്യാപിച്ചു. ഒരു പത്രസമ്മേളനത്തിൽ സംസാരിക്കവെ ജനറൽ ഇസഡ് ഗ്രൂപ്പ് നേതാവ് മിരാജ് ധുങ്കനയാണ് ഇക്കാര്യം അറിയിച്ചത്. ഇതുമായി ബന്ധപ്പെട്ട് അജണ്ടയും അദ്ദേഹം പുറത്തിറക്കി.
അതേസമയം ചില അടിസ്ഥാന വ്യവസ്ഥകൾ പാലിച്ചാൽ മാത്രമേ അടുത്ത വർഷത്തെ പൊതുതെരഞ്ഞെടുപ്പിൽ പങ്കെടുക്കാനാകൂ എന്നും റിപ്പോർട്ടുകളുണ്ട്. നേപ്പാളിലുടനീളം ജനറൽ ഇസഡ് ശബ്ദങ്ങൾ ഏകീകരിക്കുക എന്നതാണ് പുതിയ പാർട്ടി ലക്ഷ്യമിടുന്നതെന്ന് വാർത്താ ഏജൻസി പിടിഐ റിപ്പോർട്ട് ചെയ്തു.
നേരിട്ട് തിരഞ്ഞെടുക്കപ്പെട്ട എക്സിക്യൂട്ടീവ് സംവിധാനം ഏർപ്പെടുത്തുക, വിദേശത്ത് താമസിക്കുന്ന നേപ്പാളി പൗരന്മാർക്ക് വോട്ടവകാശം നൽകുക എന്നിവയുൾപ്പെടെയുള്ള പ്രത്യേക ആവശ്യങ്ങൾ സർക്കാർ നിറവേറ്റുന്നതിൽ മാത്രമേ തിരഞ്ഞെടുപ്പ് പങ്കാളിത്തം വ്യവസ്ഥ ചെയ്യൂ എന്ന് ധുങ്കന ഊന്നിപ്പറഞ്ഞതായി പിടിഐ റിപ്പോർട്ടിൽ പറയുന്നു.
തങ്ങളുടെ അജണ്ടയിൽ അഴിമതി നിയന്ത്രണത്തിനായി പൗരന്മാരുടെ നേതൃത്വത്തിലുള്ള ഒരു അന്വേഷണ സമിതി രൂപീകരിക്കുന്നതിനും സാമ്പത്തിക പരിവർത്തനത്തെക്കുറിച്ചുള്ള വ്യക്തമായ നയം സ്വീകരിക്കുന്നതിനും ധങ്കാന അടിവരയിട്ടതായി ഏജൻസി റിപ്പോർട്ടിൽ പറയുന്നു. നല്ല ഭരണം, സുതാര്യത, ഉത്തരവാദിത്തം എന്നിവയ്‌ക്കായി തുടർന്നും പോരാടുമെന്നും ജെൻ-ഇസഡ് യുവാക്കളുടെ ത്യാഗങ്ങൾ പാഴാക്കരുതെന്നും അദ്ദേഹം പറഞ്ഞു.
രാഷ്‌ട്രനിർമ്മാണത്തിൽ എല്ലാ പങ്കാളികളിൽ നിന്നും കൂട്ടായ പ്രതിബദ്ധത ആവശ്യപ്പെടുന്നതായും അദ്ദേഹം വ്യക്തമാക്കിയിട്ടുണ്ട്. കൂടാതെ പുതിയ പാർട്ടിക്ക് ഉചിതമായ പേരിടുന്നതിനുള്ള നിർദ്ദേശങ്ങൾ അവർ ഇപ്പോൾ ശേഖരിച്ചുകൊണ്ടിരിക്കുകയാണെന്നും അദ്ദേഹം കൂട്ടിച്ചേർത്തു.
ഹിമാലയൻ രാജ്യത്ത് തിരഞ്ഞെടുപ്പ് 2026 മാർച്ച് 5നാണ് നടക്കുക. നേരത്തെ ഹിമാലയൻ രാജ്യത്ത് അഴിമതിക്കെതിരെയും സോഷ്യൽ മീഡിയ സൈറ്റുകൾക്കുള്ള സർക്കാർ നിരോധനത്തിനെതിരെയും വൻ പ്രതിഷേധങ്ങൾക്ക് നേതൃത്വം നൽകിയ യുവജന നേതൃത്വത്തിലുള്ള സംഘം കെ പി ശർമ്മ ഒലിയുടെ നേതൃത്വത്തിലുള്ള സർക്കാരിനെ പുറത്താക്കുന്നതിൽ നിർണായക പങ്ക് വഹിച്ചിരുന്നു.
