ബെംഗളൂരു: ഭാര്യയുടെ ദീര്ഘകാലമായുള്ള അനാരോഗ്യമാണ് തുടര്ച്ചയായി അനസ്തേഷ്യ നല്കി അവരെ കൊല്ലാന് സര്ജനായ ഭര്ത്താവിനെ പ്രേരിപ്പിച്ചതെന്ന് പൊലീസ്. ബംഗളൂരു സ്വദേശി ഡെര്മറ്റോളജിസ്റ്റ് കൃതിക എം റെഡ്ഡിയുടെ (28) മരണത്തില് അസ്വാഭാവിക മരണത്തിന് ഏപ്രിലില് കേസെടുത്ത പൊലീസ് കഴിഞ്ഞ ദിവസം ലഭിച്ച ഫോറന്സിക് റിപ്പോര്ട്ടുകളുടെ വെളിച്ചത്തിലാണ് ഭര്ത്താവും മാറത്തഹള്ളി ഇന്സ്റ്റിറ്റ്യൂട്ട് ഓഫ് ഗ്യാസ്ട്രോഎന്ട്രോളജി സയന്സസ് ആന്ഡ് ഓര്ഗന് ട്രാന്സ്പ്ലാന്റിലെ സര്ജിക്കല് റെസിഡന്റുമായ ഡോ. മഹേന്ദ്ര റെഡ്ഡിയെ (31) അറസ്റ്റു ചെയ്തത്.’വിവാഹത്തിന് തൊട്ടുപിന്നാലെ, കൃതികയ്ക്ക് കുറഞ്ഞ രക്തസമ്മര്ദ്ദം, അന്നനാളത്തിലെ പ്രശ്നങ്ങള് എന്നിവയുള്പ്പെടെ നിരവധി ആരോഗ്യപ്രശ്നങ്ങള് ഉണ്ടെന്ന് മഹേന്ദ്ര റെഡ്ഡി കണ്ടെത്തി. വിവാഹത്തിന് മുമ്പ് ഈ വിവരം മറച്ചുവെച്ചതിന് കൃതികയുടെ മാതാപിതാക്കളോട് അദ്ദേഹം ദേഷ്യപ്പെട്ടു. ഇതായിരിക്കാം കൊലയ്ക്കു കാരണമെന്ന് ഒരു ഉദ്യോഗസ്ഥന് പറഞ്ഞു.
സംഭവത്തില് ഫോറന്സിക് പരിശോധനയില് യുവതിയുടെ ആന്തരികാവയവങ്ങളുടെ സാമ്പിളുകളില് അനസ്തേഷ്യയുടെ അംശം സ്ഥിരീകരിക്കുകയായിരുന്നു.
2024 മാര്ച്ചിലാണ് ഡെര്മറ്റോളജിസ്റ്റായ കൃതിക എം റെഡ്ഡിയെ (28) മഹേന്ദ്ര റെഡ്ഡി വിവാഹം കഴിച്ചത്. ഒരു വര്ഷത്തിനിപ്പുറം കൊല്ലപ്പെടുകയും ചെയ്തു. കൃതിക റെഡ്ഡിയുടെ മരണത്തില് അസ്വാഭാവിക മരണത്തിന് പൊലീസ് കേസെടുത്തിരുന്നു. ഏപ്രില് 24 ന് കൃതികയെ വൈറ്റ്ഫീല്ഡിലെ മുന്നേകൊലാല് വസതിയില് അബോധാവസ്ഥയില് കണ്ടെന്നും തുടര്ന്ന് ആശുപത്രിയിലേക്ക് കൊണ്ടുപോയെന്നുമാണ് മഹേന്ദ്ര റെഡ്ഡി പറഞ്ഞത്. ആശുപത്രിയില് എത്തും മുന്പ് അവര് മരിച്ചിരുന്നു. പോസ്റ്റ്മോര്ട്ടം നടത്തരുതെന്ന് ആവശ്യപ്പെട്ട് റെഡ്ഡി ആശുപത്രി ജീവനക്കാരുമായും പോലീസുമായും തര്ക്കിച്ചിരുന്നതായും പറയപ്പെടുന്നു.
