പത്തനംതിട്ട:ശബരിമല സ്വര്ണ മോഷണ കേസില് ഉണ്ണികൃഷ്ണന് പോറ്റിയെ പ്രത്യേക അന്വേഷണസംഘം വിശദമായി ചോദ്യം ചെയ്യുന്നതിനിടെ സന്നിധാനത്തും നിര്ണായക പരിശോധന. പ്രത്യേക അന്വേഷണസംഘം സന്നിധാനത്തെ ദേവസ്വം എക്സിക്യൂട്ടീവ് ഓഫിസറുടെ മുറിയിലെത്തി ഫയലുകള് പരിശോധിച്ചു.
2019 മുതലാണ് ഉണ്ണികൃഷ്ണന് പോറ്റി ശബരിമലയില് സജീവമായി ഇടപെട്ട് തുടങ്ങുന്നത്. ദേവസ്വം വിജിലന്സ് ശേഖരിച്ചതില് കൂടുതല് വിവരങ്ങള് സന്നിധാനത്തെ പരിശോധനയില് നിന്ന് കണ്ടെത്താനാകുമെന്നാണ് പ്രത്യേക അന്വേഷണസംഘം കരുതുന്നത്. എസ്പി ശശിധരന്റെ നേതൃത്വത്തിലുള്ള സംഘമാണ് പരിശോധനകള് നടത്തിയത്. ഉച്ച മുതല് സന്നിധാനത്ത് പരിശോധന നടന്നതായാണ് സൂചനകള്.
അതേസമയം ഉണ്ണികൃഷ്ണന് പോറ്റിയെ അന്വേഷണസംഘം ഉടന് അറസ്റ്റ് ചെയ്യുമെന്നാണ് അറിയുന്നത്. തിരവനന്തപുരം ഈഞ്ചക്കലിലെ ക്രൈംബ്രാഞ്ച് ഓഫീസിലാണ് ചോദ്യം ചെയ്യല് പുരോഗമിക്കുന്നത്. ഉണ്ണികൃഷ്ണന് പോറ്റിയുടെ സുഹൃത്ത് അനന്ത സുബ്രമണ്യം ശബരിമലയില് നിന്നും ബാംഗ്ലൂര് എത്തിച്ച സ്വര്ണപ്പാളി ഏറിയ ദിവസം സൂക്ഷിച്ചത് ഹൈദരാബാദിലാണ് എന്നാണ് അന്വേഷണ സംഘത്തിന്റെ കണ്ടെത്തല്.
സ്മാര്ട്ട് ക്രിയേഷന്സ് സിഇഒയുടെ ഉടമസ്ഥതയില് എന്ന് കരുതുന്ന ഹൈദരാബാദിലെ സ്ഥാപനത്തിലും അന്വേഷണം നടത്തും.സ്മാര്ട്ട് ക്രിയേഷന്സില് നടത്തിയ പരിശോധനയില് ഫയലുകള് കണ്ടെത്താന് ആയിട്ടില്ല. സ്മാര്ട്ട് ക്രിയേഷന്സിന്റെ ഇടപാടുകളില് ദുരൂഹത ഉണ്ടെന്നാണ് സംശയം.
