കൊച്ചി: മുനമ്പത്തെ വിവാദ ഭൂമി വഖഫ് സ്വത്തല്ലെന്ന് ഹൈക്കോടതി. ഇതു സംബന്ധിച്ച പ്രഖ്യാപനം നിയമവിരുദ്ധമാണെന്നും കോടതി വ്യക്തമാക്കി. ”ഭൂമിയുമായി ബന്ധപ്പെട്ട, 1950ലെ പ്രമാണ പ്രകാരം അത് ഫറൂഖ് മാനേജ്മെന്റിനുള്ള ഇഷ്ടദാനമാണ്. എന്നന്നേക്കുമായി അള്ളാഹുവിന് സമര്‍പ്പിക്കാന്‍ ഉദ്ദേശിച്ചുള്ളതേയല്ല. അതിനാല്‍ 1954, 1984, 1995 വര്‍ഷങ്ങളിലുള്ള ഒരു വഖഫ് നിയമ പ്രകാരവും ആ ഭൂമിയെ വഖഫായി പ്രഖ്യാപിക്കാനും കഴിയില്ല”, ജസ്റ്റിസ് എസ്.എ. ധര്‍മാധികാരി, ജസ്റ്റിസ് വി.എം. ശ്യാംകുമാര്‍ എന്നിവരടങ്ങിയ ഡിവിഷന്‍ ബെഞ്ച് വ്യക്തമാക്കി.
വസ്തു ലഭിച്ച് 69 വര്‍ഷത്തിന് ശേഷമാണ് വഖഫ് സ്വത്താണെന്ന് പ്രഖ്യാപിക്കുന്നത്. ഇത്രയുംനാള്‍ ഉറങ്ങുകയായിരുന്നോ, കോടതി ചോദിച്ചു. വഖഫ് ബോര്‍ഡ് തീരുമാനം നിയമ വിരുദ്ധമാണ്. അതു ഭൂമി തട്ടിയെടുക്കാനുള്ള ബോര്‍ഡിന്റെ കുതന്ത്രമായിരുന്നു. വഖഫായി പ്രഖ്യാപിക്കുന്നതിനു പതിറ്റാണ്ടുകള്‍ക്കു മുമ്പു പണം നല്കി ഭൂമി വാങ്ങിയ, നൂറുകണക്കിനു കുടുംബങ്ങളെയാണ് ഇതു ബാധിച്ചത്. അവര്‍ക്കു പ്രതിഷേധവുമായി തെരുവില്‍ ഇറങ്ങേണ്ടി വന്നു. പ്രഖ്യാപനം വഖഫ് നിയമങ്ങളുടെ പോലും ലംഘനമാണ്. അതിനാല്‍ അതു നടപ്പാക്കാനുമാകില്ല. പ്രഖ്യാപനം നിയമ വിരുദ്ധമാണെങ്കിലും ഞങ്ങള്‍ അതു റദ്ദാക്കുന്നില്ല, എന്തെന്നാല്‍ ഭൂമി വഖഫായി പ്രഖ്യാപിച്ച ബോര്‍ഡ് തീരുമാനം സര്‍ക്കാരിനു ബാധകമേയല്ല, കോടതി വ്യക്തമാക്കി. അതേ സമയം സി.എന്‍. രാമചന്ദ്രന്‍ നായര്‍ കമ്മിഷനെ നിയമിച്ചത് റദ്ദാക്കിയ സിംഗിള്‍ ബെഞ്ച് ഉത്തരവ് ഡിവിഷന്‍ ബെഞ്ച് റദ്ദാക്കിയിട്ടുമുണ്ട്.
