കൊല്ലം: നാട്ടുകാരുടെ ഉറക്കം കെടുത്തിയ പുലി കിണറിനുള്ളില് കുടുങ്ങി. പിറവന്തൂര് പഞ്ചായത്തിലെ കറവൂറിലായിരുന്നു സംഭവം. പെരുന്തോയില് ചാങ്ങപ്പാറ ലക്ഷ്മി ഭവനില് ഷീബയുടെ വീട്ടിലെ കിണറ്റിലാണ് പുലി വീണത്.
പതിനാല് അടിയോളം താഴ്ചയുള്ള ഉള്ള കിണറ്റില് വെളളിയാഴ്ച പുലര്ച്ചയോടെയാകാം പുലി അകപ്പെട്ടത് എന്നാണ് നിഗമനം. കിണറിനുള്ളില് നിന്നും പുലി നിരവധി തവണ കരയിലേക്ക് കയറാന് ശ്രമിച്ചതിന്റെ അടയാളവും കാണാമായിരുന്നു. രാവിലെ കിണറ്റില് നിന്നും വെള്ളം എടുക്കാന് എത്തിയ വീട്ടുകാരാണ് പുലിയെ കണ്ടത്. ബഹളം വെച്ചതോടെ പ്രദേശവാസികള് ഓടിയെത്തുകയും വനപാലകരെ വിവരമറിയിക്കുകയും ചെയ്തു.
അക്രമകാരിയായ പുലിയെ മയക്ക് വെടി വെച്ച് കരക്കെത്തിക്കാനായിരുന്നു തീരുമാനമെങ്കിലും പിന്നീടത് ഉപേക്ഷിച്ചു.തുടര്ന്ന് അഗ്നിശമനസേനയെ വിളിച്ചുവരുത്തി ഉച്ചയ്ക്ക് 12.30 കയര് വലയുടെ സഹായത്തോടെ പുലിയെ കരയിലേക്ക് കയറ്റി. കയര് വലയില് നിന്നും പ്രത്യേകം സജ്ജീകരിച്ച കമ്പിക്കൂട്ടിലേക്ക് പുലിയെ മാറ്റുകയും ചെയ്തു. കഴിഞ്ഞ രാത്രി കാട്ടാനയുടെയും പുലിയുടെയും ഉള്പ്പെടെയുള്ള ശബ്ദം നാട്ടുകാര് കേട്ടതായി പറയുന്നു. വന്യമൃഗങ്ങള് തമ്മിലുള്ള ആക്രമണത്തെ തുടര്ന്ന് പുലി കിണറ്റില് വീണതാകാം എന്നും സംശയമുണ്ട്.
പുലി കിണറ്റില് വീണതറിഞ്ഞ് നിരവധി പേരാണ് പ്രദേശത്ത് തടിച്ച് കൂടിയത്. അമ്പനാര് ഫോറസ്റ്റ് സ്റ്റേഷനില് എത്തിച്ച പുലിയെ പിന്നീട് ഗവി വനമേഖലയില് തുറന്ന് വിട്ടു. ഏകദേശം അഞ്ചു വയസോളം പ്രായമുള്ള ആണ്പുലിയാണ് കിണറ്റില് അകപ്പെട്ടതെന്ന് വനംവകുപ്പ് അധിക്യതര് പറഞ്ഞു. ഒരാഴ്ചക്കിടെ നാല് വളര്ത്തു നായകളെയാണ് പുലി പിടിച്ചത്. ഉറക്കം കെടുത്തിയ പുലി വലയിലായ സന്തോഷത്തിലാണ് ചാങ്ങപ്പാറ നിവാസികള്. പുനലൂര് ഡി എഫ് ഒ ഷാജികുമാര്, റേഞ്ച് ഓഫീസര്മാരായ ഡി ഗിരി, ടി ആര് മനോജ്, എസ് ദിവ്യ, മഹാദേവര്മണ് ഡെപ്യൂട്ടി റേഞ്ചര് എം എ ഷാജി എന്നിവരുടെ നേത്വത്തിലാണ് പുലിയെ കരക്കെത്തിച്ചത്.
