കോഴിക്കോട്: പ്രധാനമന്ത്രി വയനാടിനെ അവഗണിച്ചുവെന്ന പ്രിയങ്ക ഗാന്ധിയുടെ ആരോപണം അറിവില്ലായ്മ കൊണ്ടാണെന്ന് ബിജെപിദേശീയ ഉപാധ്യക്ഷന്‍ എ.പി. അബ്ദുള്ളക്കുട്ടി പ്രസ്താവിച്ചു. അവസാനം തന്ന 260 കോടിയടക്കം കേന്ദ്രം വയനാടിന് 1000 കോടിലധികം കൊടുത്തിട്ടുണ്ട്.
അതില്‍ 500 കോടി പലിശ രഹിത ലോണ്‍ ആണ്. 50 വര്‍ഷം കൊണ്ട് തിരിച്ചടച്ചാല്‍ മതി. പുനരധിവാസം, ദുരിതാശ്വാസ പ്രവര്‍ത്തനം എന്നിവയെക്കുറിച്ച് പ്രിയങ്കയ്‌ക്കും പിണറായിക്കും തികഞ്ഞ അജ്ഞതയാണ്. അത് മറച്ചുവെക്കാനാണ് അസംബന്ധം പറയുന്നത്.
ഹിമാചല്‍പ്രദേശിലെ കുളു – മണാലിയിലെ സ്വന്തം ബംഗ്ലാവില്‍ അമ്മ സോണിയ ഇടയ്‌ക്കിടെ സുഖവാസത്തിന് പോകുന്നത് പോലെ വയനാട് പ്രിയങ്കയ്‌ക്ക് ഒരു സുഖവാസകേന്ദ്രം മാത്രമാണ്.
എന്നാല്‍ അതിനിടയില്‍ വ്യാജ ആരോപണങ്ങള്‍ ഉന്നയിക്കരുത്. രാഷ്‌ട്രീയ അജ്ഞതയുടെ പ്രകടനമായി അത് മാറുകയാണ്, അദ്ദേഹം പറഞ്ഞു.
