കശ്മീര്‍: ലഡാക്കിലെ ലേയില്‍ ബിജെപി ഓഫീസ് കത്തിച്ച് കലാപം ആളിക്കത്തിക്കാന്‍ ശ്രമിച്ചത് ലേയിലെ കോണ്‍ഗ്രസ് കൗണ്‍സിലര്‍ സെപാഗ്. കയ്യില്‍ ഒരു ഇരുമ്പുവടിയും പിടിച്ച് കലാപസ്ഥലത്ത് കോപത്തോടെ നടക്കുന്ന ഇയാളുടെ വീഡിയോ വൈറലായി പ്രചരിച്ചിരുന്നു. എന്നാല്‍ ഇത് തന്റെ ചിത്രമല്ലെന്ന് പറഞ്ഞ് സെപാഗ് രംഗത്ത് വന്നെങ്കിലും പൊലീസ് അറസ്റ്റ് ചെയ്യാന്‍ എത്തിയതോടെ ഇയാള്‍ മുങ്ങിയിരിക്കുകയാണ്.
ഇയാളെ ചോദ്യം ചെയ്താല്‍ ലെയില്‍ ബിജെപി ഓഫീസ് കത്തിച്ചതും നാല് പേരുടെ മരണത്തിനും 70 പേരുടെ പരിക്കിനും കാരണമായ കലാപം ആരുടെ ഗൂഢാലോചനയാണെന്ന് അറിയാമെന്ന് കരുതുന്നു. പക്ഷെ കഴിഞ്ഞ എത്രയോ മണിക്കൂറുകളായി ഇയാളുടെ മൊബൈല്‍ ഫോണ്‍ സ്വിച്ചോഫ് ആണ്. ഒളിവില്‍ പോയ സെപാഗിനെക്കുറിച്ച് യാതൊരു വിവരവുമില്ല.
നേരത്തെ എന്‍ജിഒ സംഘടനയുടെ നേതാവായ സോനം വാങ്ചുക് കലാപം നടത്താന്‍ ജനങ്ങളെ പ്രേരിപ്പിച്ചിരുന്നു. ഈ പ്രസംഗവും പുറത്തുവന്നിട്ടുണ്ട്. അതിന് പിന്നാലെയാണ് യുവാക്കളെ കലാപത്തിന് പ്രേരിപ്പിക്കാന്‍ കോണ്‍ഗ്രസ് കൗണ്‍സില്‍ സേപാഗ് ആയുധവും കയ്യില്‍വെച്ച് ലേയില്‍ എത്തുന്ന വീഡിയോ വൈറലായത്. സോനം വാങ് ചുക് ഇപ്പോള്‍ ജയിലിലാണ്.
