കിഴക്കമ്പലം (കൊച്ചി): നമ്മുടെ രാഷ്‌ട്രം ഇന്ന് ഉന്നതിയിലാണെന്നും അധര്‍മത്തെ എതിര്‍ക്കുകയും ധര്‍മത്തെ കാത്തുസൂക്ഷിക്കുകയുമാണ് നമ്മുടെ ലക്ഷ്യമെന്ന് മുന്‍ ഡിജിപി ഡോ. ജേക്കബ് തോമസ്. ആര്‍എസ്എസ് കുമാരപുരം മണ്ഡലം വിജയദശമി മഹോത്സവത്തില്‍ അധ്യക്ഷത വഹിക്കുകയായിരുന്നു അദ്ദേഹം.
ഓരോ വ്യക്തിയും ആദ്ധ്യാത്മിക, ബൗദ്ധിക, കായിക, മാനസിക ശക്തി ആര്‍ജിക്കണം. സാമൂഹ്യമാധ്യമങ്ങളുടെ കരുത്തും സ്വായത്തമാക്കണം. ആര്‍എസ്എസില്‍ എല്ലാവരും തുല്യരാണ്. അവിടെ മത, ജാതി പരിഗണനകള്‍ ഇല്ല. കേരളത്തിലെ വിദ്യാഭ്യാസമേഖല കോപ്പിയടി കേന്ദ്രങ്ങളായി മാറുന്നു. മറ്റു മേഖലകളിലും പൗരന് നീതി ലഭിക്കാതെ വരുന്നു. മദ്യവും മറ്റു ലഹരി വസ്തുക്കളുടെ ഉപയോഗവും വര്‍ധിച്ചു വരുന്നു. നമ്മുടെ നാടിനെ സംരക്ഷിക്കേണ്ടത് നമ്മുടെ ധര്‍മമാണ്. ആരോഗ്യമേഖലയും മലീമസമാകുന്നുണ്ട്, ഇവിടെയെല്ലാം നാം ശ്രദ്ധിക്കേണ്ടതുണ്ടെന്നും അദ്ദേഹം പറഞ്ഞു.
പൂര്‍ണ ഗണവേഷം ധരിച്ചാണ് പെതുപരിപാടിയില്‍ അദ്ദേഹം പങ്കെടുത്തത്. ആര്‍എസ്എസ് മൂവാറ്റുപുഴ ജില്ലാ പ്രചാരക് സി. സുരേഷ,് എറണാകുളം വിഭാഗ് കാര്യവാഹ് കെ.സി. ബിജുമോന്‍ എന്നിവര്‍ സന്നിഹിതരായിരുന്നു.
