പന്തളം: നാടിന്റ സമഗ്രവികസനത്തിന്റെ അടിസ്ഥാനമാണ് ഗതാഗത സൗകര്യങ്ങളെന്ന് കേന്ദ്രമന്ത്രി ജോര്ജ് കുര്യന്. പന്തളം നഗരസഭ നിര്മ്മിച്ച സ്വാമി അയ്യപ്പന് ബസ് ടെര്മിനല് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
പത്തു വര്ഷം കൊണ്ട് ഭാരതം സമാനതകളില്ലാത്ത വളര്ച്ചയാണ് കൈവരിച്ചത.് ലോക നിലവാരമുള്ള റോഡുകള്, രാജ്യത്തിന്റെ എല്ലാ ഭാഗങ്ങളേയും ബന്ധിപ്പിച്ച് റെയില്വേ ശൃംഖല, രാജ്യാന്തര നിലവാരമുള്ള വ്യോമയാന മേഖല എന്നിവ ഭാരതത്തിന് സ്വന്തമായി. 2047 ആകുമ്പോള് ഭാരതം ലോകത്തെ പ്രഥമ ശക്തിയായി മാറുമെന്നും അദ്ദേഹം പറഞ്ഞു.
പന്തളത്ത് ഭഗവാന്റെ ഹിതമാണ് വിശ്വാസികളിലൂടെ നിറവേറിയത്. അയ്യപ്പന് ജനിച്ച മണ്ണിന്റെ സമഗ്ര പുരോഗതിക്ക് ഉതകുന്ന ബസ്റ്റാന്ഡിന് സ്വാമി അയ്യപ്പന് മുനിസിപ്പല് ബസ്റ്റാന്ഡ് എന്ന് നാമകരണം ചെയ്തത് അങ്ങേയറ്റം സ്വാഗതാര്ഹമാണെന്നും മന്ത്രി പറഞ്ഞു. ബിജെപി നേതൃത്വത്തിലുള്ള പന്തളം നഗരസഭാ ഭരണസമിതി 75 ലക്ഷം രൂപ മുതല് മുടക്കിലാണ് സ്വാമി അയ്യപ്പന് ബസ് ടെര്മിനല് യാഥാര്ത്ഥ്യമാക്കിയത്.
കെഎസ്ആര്ടിസി ബസ് സ്റ്റാന്ഡിനു സമീപത്താണ് പുതിയ പ്രൈവറ്റ് ബസ് സ്റ്റാന്ഡ് എന്നത് യാത്രക്കാര്ക്ക് ഏറെ സൗകര്യപ്രദമാണ്. ശുചിമുറി ഉള്പ്പെടെ എല്ലാ സൗകര്യങ്ങളും ഒരുക്കിയിട്ടുണ്ട്. ഉടന്തന്നെ ബൈപ്പാസ് നിര്മാണം പൂര്ത്തീകരിക്കും. ഇതിനായി 35 ലക്ഷം രൂപ വകയിരുത്തിയിട്ടുണ്ടന്ന് യോഗത്തില് അധ്യക്ഷനായ മുന്സിപ്പല് ചെയര്പേഴ്സണ് അച്ചന് കുഞ്ഞ് ജോണ് പറഞ്ഞു. നഗരസഭാ സെക്രട്ടറി ഇ.ബി. അനിത, വൈസ് ചെയര്പേഴ്സണ് യു. രമ്യ, ബിജെപി ജില്ലാ പ്രസിഡന്റ് വി.എ. സൂരജ് തുടങ്ങിയവര് പ്രസംഗിച്ചു.
