ഡെറാഡൂണ്‍: ജെന്‍ സീ തലമുറയ്‌ക്കിടയില്‍ രാഹുല്‍ ഗാന്ധിയുടെ സാമ്രാജ്യം തകരുകയാണ്. ഉത്തരാഖണ്ഡ് യൂണിവേഴ്സിറ്റി യൂണിയന്‍ പിടിച്ചടക്കിയിരിക്കുകയാണ് എബിവിപി. 58 യൂണിയന്‍ പ്രസിഡന്‍റുമാര്‍ ഉള്‍പ്പെടെ 332 പോസ്റ്റുകളില്‍ എബിവിപി വിജയം നേടി.
ദേശവിരുദ്ദ, സനാതന വിരുദ്ധ ശക്തികള്‍ക്ക് ഉത്തരാഖണ്ഡിലെ വിദ്യാര്‍ത്ഥിസമൂഹം നല്‍കുന്ന വലിയ തിരിച്ചടിയാണ് സംസ്ഥാനത്തെ വിവിധ കോളെജുകളിലെ യൂണിയനുകളില്‍ എബിവിപി നേടിയ വിജയമെന്ന് ഉത്തരാഖണ്ഡ് മുഖ്യമന്ത്രി പുഷ്കര്‍ ധമി പറഞ്ഞു.
ഉത്തരാഖണ്ഡിലെ പ്രധാന കോളെജുകളായ ഡിഎവി പിജി കോളെജ്, എച്ച് എന്‍ബി ഗര്‍വാള്‍ കോളെജ്, ശുദ്ധോവാല ഡൂണ്‍ കോളെജ്, ഋഷികേശ് കോളെജ്, കോട് വാര്‍ കോളെജ്, കടിമ കോളെജ്, ശ്രീനഗര്‍ കോളെജ് എന്നിവിടങ്ങളിലെ യൂണിയനുകള്‍ എബിവിപി പിടിച്ചെടുത്തു. നഗര, അര്‍ധനഗര, ഹില്‍ പ്രദേശ കോളെജുകളിലെല്ലാം എബിവിപിയുടെ സ്വാധീനം വിദ്യാര്‍ത്ഥികള്‍ക്കിടയില്‍ വര്‍ധിക്കുകയാണ്. ഡിഎവി പിജി കോളെജില്‍ രണ്ട് വര്‍ഷത്തെ ഇടവേളയ്‌ക്ക് ശേഷമാണ് എബിവിപി പിടിച്ചടക്കിയത്.
ആകെ എബിവിപി നേടിയ 332 സീറ്റുകളില്‍ 58 പ്രസിഡന്‍റുമാര്‍, 52 വൈസ് പ്രസിഡന്‍റുമാര്‍, 47 ജനറല്‍ സെക്രട്ടറിമാര്‍, 51 ട്രഷറര്‍മാര്‍, 50 ജോയിന്‍റ് സെക്രട്ടറിമാര്‍, 62 സര്‍വ്വകലാശാല പ്രതിനിധികള്‍, 6 കള്‍ച്ചറല്‍ സെക്രട്ടറിമാര്‍, 6 വനിതാ വൈസ് പ്രസിഡന്‍റുമാര്‍ എന്നിവര്‍ വിജയിച്ചു. എബിവിപിയിലൂടെ വളരുന്നവരാണ് നാളെ യുവമോര്‍ച്ചയെയും ബിജെപിയെയും നയിക്കുന്നവരാകുന്നത്.
ഇന്നത്തെ വിദ്യാര്‍ത്ഥികള്‍ മൂല്യങ്ങളാല്‍ നയിക്കപ്പെടുന്ന, ജീവല്‍പ്രശ്നങ്ങളെ കേന്ദ്രീകരിക്കുന്ന, സുതാര്യമായ രാഷ്‌ട്രീയമാണ് ആഗ്രഹിക്കുന്നത്. അതാണ് എബിവിപിയെന്ന് വിജയിച്ച നേതാക്കള്‍ പറഞ്ഞു.
