ലേ: സംസ്ഥാന പദവി ആവശ്യപ്പെട്ട് കേന്ദ്രഭരണ പ്രദേശമായ ലഡാക്കിൽ തുടങ്ങിയ പ്രക്ഷോഭം അക്രമാസക്തമായി. പ്രക്ഷോഭകർ ബിജെപി ഓഫീസിന് നേരെ കല്ലെറിയുകയും പോലീസുമായി ഏറ്റുമുട്ടുകയും ചെയ്തു.
ഏതാനും ആഴ്ചകളായി അസ്വസ്ഥതകൾ തുടങ്ങിയിട്ട്. അക്രമികൾ ഒരു പോലീസ് വാൻ കത്തിച്ചു. ചില കെട്ടിടങ്ങൾക്കും ഓഫീസുകൾക്കും തീപ്പിടിച്ചിട്ടുണ്ട്.
കേന്ദ്രഭരണ പ്രദേശത്തിന് സംസ്ഥാന പദവിയും ആറാം ഷെഡ്യൂൾ പദവിയും ആവശ്യപ്പെട്ട് കഴിഞ്ഞ 14 ദിവസമായി നിരാഹാര സമരം നടത്തുന്ന പരിസ്ഥിതി പ്രവർത്തക സോനം വാങ്ചുക്കിനോട് ഐക്യദാർഢ്യം പ്രകടിപ്പിക്കാൻ ലേ അപെക്‌സ് ബോഡി (ലാബ്)യുടെ യുവജന വിഭാഗമാണ് പ്രതിഷേധത്തിന് ആഹ്വാനം ചെയ്തത്.
സെപ്തംബർ 20 ന്, ലഡാക്കി നേതൃത്വവുമായി ചർച്ച പുനരാരംഭിക്കുമെന്ന് കേന്ദ്ര ആഭ്യന്തര മന്ത്രാലയം പ്രഖ്യാപിച്ചിരുന്നു, അടുത്ത റൗണ്ട് ഒക്ടോബർ ആറിന് എന്ന് നിശ്ചയിക്കുകയും ചെയ്തിരുന്നു.
