പന്തളം: ഓരോ തീര്ത്ഥാടന കാലത്തും കോടിക്കണക്കിന് ഭക്തരെത്തുന്ന ശബരിമല പോലെ വേറെ ഒരു പുണ്യക്ഷേത്രമില്ലെന്നും അതിനാല് അയ്യപ്പധര്മ്മ സംരക്ഷണം ഭക്തരുടെ കടമയാണെന്നും സ്വാമി അയ്യപ്പദാസ്.
ശബരിമലയെ തകര്ക്കാനുള്ള ശ്രമങ്ങളാണ് പതിറ്റാണ്ടുകളായി നടക്കുന്നത്. ഭക്തിയും വിശ്വാസവും പരസ്പര പൂരകമാണ്. ശബരിമല അയ്യപ്പ വിശ്വാസം എന്നത് പറഞ്ഞറിയിക്കാന് പറ്റാത്തതാണ്. വ്രതാനുഷ്ഠാനത്തോടെ ഓരോരുത്തരും അയ്യപ്പനായി മാറുകയാണ്. മറ്റു ക്ഷേത്രങ്ങളില് എത്തുന്നവര് ദേവനെയും ദേവിയെയും ദര്ശിക്കുമ്പോള് ശബരിമലയില് മാത്രമാണ് ഭക്തനും ഭഗവാനും ഒന്ന്(തത്ത്വമസി) എന്ന സന്ദേശം ഉള്ളത്. കേരളീയ ഹൈന്ദവ ജനതയുടെ ഏകതാ കേന്ദ്രമാണ് ശബരിമല. മാലയിട്ടുകഴിഞ്ഞാല് ഭേദചിന്ത മാറ്റി എല്ലാവരും സ്വാമിമാരാകുന്നു.സനാതന ധര്മം സംരക്ഷിക്കാന് കഴിയുന്ന ഒരു സര്ക്കാരും ഇതുവരെ കേരളത്തില് അധികാരത്തില് വന്നിട്ടില്ല. സനാതന ധര്മ്മത്തിന് എതിരായ ഒരു സംവിധാനത്തെയും അംഗീകരിക്കാനാകില്ല. സനാതനധര്മ്മ സംരക്ഷണത്തിന് എന്തു ത്യാഗവും സഹിക്കാന് കഴിയുന്നവരായി ഓരോ വിശ്വാസിയും മാറണം. അയ്യപ്പസ്വാമിക്കെതിരെ ഒരു ശബ്ദവും ഉയരാതിരിക്കേണ്ടത് ഓരോ ഭക്തന്റെയും കടമയാണെന്നും സ്വാമി അയ്യപ്പദാസ് പറഞ്ഞു.
തകര്ക്കാന് ശ്രമിക്കുന്നവര് തകരുകയേ ഉള്ളൂ: പൂജപ്പുര കൃഷ്ണന്നായര്
പന്തളം: ശബരിമലയിലെ വിശ്വാസവും ആചാരവും ഉപിനിഷത്തുകളില് അധിഷ്ഠിതമാണ്. സന്നിധാനത്തെ ആചാരാനുഷ്ഠാനങ്ങളില് ഇത് വ്യക്തമാണ്. അയ്യപ്പ തത്ത്വത്തെ സാക്ഷാത്കരിക്കുമ്പോഴുണ്ടാകുന്നത് പ്രത്യേക ആനന്ദമാണ്. ശബരിമലയ്ക്ക് കോട്ടം വരുത്താന് ഒരു ശക്തിക്കും സാധിക്കില്ല. ഇതിനായി ഇറങ്ങിത്തിരിക്കുന്നവര്ക്കാണ് കോട്ടം സംഭവിക്കുന്നതെന്നും അദ്ദേഹം പറഞ്ഞു.
