ന്യൂയോര്‍ക്ക്: അമേരിക്കയെ വീണ്ടും മികച്ച രാജ്യമാക്കാന്‍ ഉദ്ദേശിച്ച ഡൊണാള്‍ഡ് ട്രംപ് നടപ്പാക്കുന്ന ഭ്രാന്തമായ മാഗ (മെയ്‌ക്ക് അമേരിക്ക ഗ്രേറ്റ് എഗെയ്ന്‍) നയം ലോകരാജ്യങ്ങള്‍ക്ക് തലവേദനയാകുന്നു. മറ്റ് രാജ്യങ്ങളില്‍ നിന്നും അമേരിക്കയിലേക്കുള്ള തൊഴിലാളികളുടെ കുടിയേറ്റം അവസാനിപ്പിക്കുക, അമേരിക്ക വീണ്ടും അമേരിക്കക്കാരായ വെള്ളക്കാരുടെ രാജ്യമാക്കി മാറ്റുക എന്ന നയം നടപ്പാക്കുന്നതിന്റെ ഭാഗമായാണ് എച്ച് 1 ബി വിസയ്‌ക്കുള്ള അപേക്ഷയുടെ ഫീസ് 88 ലക്ഷം രൂപയാക്കി ഉയര്‍ത്തിയത്. എച്ച് 1 ബി വിസയുടെ ഫീസ് ഒരു ലക്ഷം ഡോളര്‍ (ഏകദേശം 88 ലക്ഷം രൂപ) ആക്കി പൊടുന്നനെ ഉയര്‍ത്തിയിരിക്കുകയാണ് ട്രംപ്. ഇത് അമേരിക്കയില്‍ ജോലി ചെയ്യുന്ന ഇന്ത്യക്കാരുടെ കുടുംബങ്ങള്‍ക്ക് വലിയ തലവേദന സൃഷ്ടിക്കും. സെപ്തംബര്‍ 21 മുതല്‍ ഈ തീരുമാനം നിലവില്‍ വരും.
വിദേശീയരുടെ അമേരിക്കയിലേക്കുള്ള കുടിയേറ്റം കുറയ്‌ക്കുക, പരമാവധി തൊഴിലവസരങ്ങള്‍ അമേരിക്കക്കാര്‍ക്ക് തന്നെ നല്‍കുക എന്നീ ട്രംപിന്റെ നയങ്ങളുടെ ഭാഗമാണ് ഈ നടപടി. പക്ഷെ ഇത് വിവിധ രാജ്യങ്ങള്‍ക്ക് വലിയ തലവേദന സൃഷ്ടിക്കുകയാണ്.
മാത്രമല്ല, അമേരിക്കയിലെ ഗൂഗിള്‍, ആപ്പിള്‍ ഉള്‍പ്പെടെയുള്ള വമ്പന്‍ ടെക് കമ്പനികളോട് അമേരിക്കക്കാരെ കൂടുതലായി ജോലിക്കെടുക്കാന്‍ നിര്‍ബന്ധിച്ചിരിക്കുകയാണ് ട്രംപ്. മാത്രമല്ല, ഈ ടെക് കമ്പനികളോട് അമേരിക്കയില്‍ കൂടുതലായി നിക്ഷേപം നടത്താനും ട്രംപ് ആവശ്യപ്പെട്ടിരിക്കുകയാണ്. ഇതും ടെക് കമ്പനികളെ വല്ലാതെ ആശയക്കുഴപ്പത്തിലാക്കിയിരിക്കുകാണ്. നേരത്തെ 1500 ഡോളര്‍ മാത്രമായിരുന്നു എച്ച് 1 ബി വിസ ഫീസ്. 1.32 ലക്ഷം രൂപ മാത്രമായിരുന്നു ഫീസ്. വര്‍ഷം തോറും പുതുക്കേണ്ട ഒന്നാണ് എച്ച് 1 ബി വിസ. അമേരിക്ക ആകെ അനുവദിക്കുന്ന എച്ച് 1 ബി വിസയില്‍ 65 ശതമാനം ഉപയോഗിക്കുന്നത് ഐടി രംഗത്തെ ജീവനക്കാരാണ്.
ട്രംപിന്റെ തലതിരിഞ്ഞ നയം അമേരിക്കയുടെ ഭാവി തകര്‍ക്കുമെന്ന് മുന്‍ യുഎസ് നയതന്ത്രോദ്യോഗസ്ഥര്‍ പറയുന്നു. സോഫ്റ്റ് വെയര്‍ നൈപുണ്യമുള്ള ഇന്ത്യന്‍ ടെക്കികളെ അമേരിക്കയില്‍ നിന്നും പുറന്തള്ളാന്‍ ശ്രമിക്കുന്നത് ഭാവിയില്‍ അമേരിക്കയുടെ മുന്നേറ്റം തടയുമെന്ന് ബില്‍ ഗേറ്റ്സിനെപ്പോലുള്ളവര്‍ പറയുന്നു. എച്ച് 1 ബി വിസ ഫീസ് 88 ലക്ഷം രൂപയാക്കി ഉയര്‍ത്തുക എന്നത് ഭ്രാന്തന്‍ നയമാണെന്ന് അമേരിക്കയിലെ ടെക് മേധാവികള്‍ പറയുന്നു. ഇന്ത്യയില്‍ നിന്നും എച്ച് 1ബി, എച്ച് 4 എന്നീ വിസകളില്‍ കഴിയുന്ന ജീവനക്കാരോട് ഒന്നുകില്‍ അമേരിക്കയില്‍ തുടരാനും ഇന്ത്യയില്‍ ഉള്ളവരോട് ഉടനെ അമേരിക്കയിലേക്ക് ചെല്ലാനും ആവശ്യപ്പെട്ടിരിക്കുകയാണ് മൈക്രോസോഫ്റ്റ്, ആമസോണ്‍ തുടങ്ങിയ പ്രമുഖ കമ്പനികള്‍ എല്ലാം.
