ന്യൂയോര്‍ക്ക്: അടിസ്ഥാന പലിശനിരക്ക് വെട്ടിക്കുറച്ച് യുഎസ് കേന്ദ്രബാങ്കായ ഫെഡറല്‍ റിസര്‍വ്. അടിസ്ഥാന പലിശ നിരക്ക് കാല്‍ ശതമാനമാണ് കുറച്ചത്. യുഎസ് പ്രസിഡന്‍റായി അധികാരമേറ്റ അന്ന് മുതല്‍ നിരന്തരം ഈ ആവശ്യം ഉയര്‍ത്തി ട്രംപ് സമ്മര്‍ദ്ദം ചെലുത്തിയെങ്കിലും പവല്‍ വഴങ്ങിയിരുന്നില്ല. ഒടുവിലൊടുവില്‍ വലിയ ഏറ്റുമുട്ടലിലേക്ക് കാര്യങ്ങള്‍ എത്തിയതോടെയാണ് ട്രംപിന്റെ നിര്‍ദേശം സ്വീകരിച്ച് ഫെഡറല്‍ റിസര്‍വ് ചെയര്‍മാന്‍ ജെറോം പവല്‍ പലിശനിരക്ക് വെട്ടിക്കുറച്ചതായി പ്രഖ്യാപിച്ചത്.
പലിശനിരക്ക് കുറച്ചാല്‍ എന്ത് സംഭവിക്കും?
ഈ നീക്കം യുഎസില്‍ പണലഭ്യത കൂട്ടും. വായ്‌പകള്‍ക്കുള്ള പലിശ കുറയുന്നതോടെ കൂടുതല്‍ പേര്‍ വായ്‌പകള്‍ എടുക്കാന്‍ തുടങ്ങും. പണം വിപണിയില്‍ എത്തുന്നതോടെ അമേരിക്കന്‍ സമ്പദ്ഘടന സജീവമാകും എന്നാണ് പ്രതീക്ഷ. ഇത് ബിസിനസ് രംഗത്തും ചലനങ്ങള്‍ സൃഷ്ടിക്കും. ട്രംപിന് വലിയ ആശ്വാസമാകും ഈ നീക്കം.
ഇന്ത്യന്‍ ഓഹരിവിപണിക്ക് ഇനി നല്ലകാലം
ഈ പ്രഖ്യാപനം ഇന്ത്യന്‍ ഓഹരി വിപണിക്ക് കുതിപ്പേകി. ഭാവിയില്‍ അമേരിക്കയില്‍ പലിശനിരക്ക് കുറയുന്നതോടെ ഇന്ത്യന്‍ വിപണിയിലേക്ക് അമേരിക്കന്‍ പണം ഒഴുകുമെന്ന് കണക്കുകൂട്ടുന്നു. അമേരിക്ക പലിശ നിരക്ക് കുറയ്‌ക്കുമെന്ന അഭ്യൂഹമുണ്ടായതിനെ തുടര്‍ന്ന് കഴിഞ്ഞ ഏതാനും നാളുകളായി ഇന്ത്യന്‍ വിപണി മുന്നേറ്റം കാണിച്ചിരുന്നു.
ഈ വര്‍ഷം ഇനി രണ്ട് തവണ കൂടി പലിശ കുറയ്‌ക്കുമെന്നും പവല്‍ വ്യക്തമാക്കി. പുതിയ നിരക്ക് നാലിനും നാലേ കാല്‍ ശതമാനത്തിനും ഇടയിലാണ്. ഈ വര്‍ഷത്തെ ആദ്യ ഇളവാണ് പ്രഖ്യാപിച്ചത്.
ട്രംപിന്റെ കരങ്ങള്‍ക്ക് ശക്തികൂട്ടുന്ന നടപടി
ഡൊണാള്‍ഡ് ട്രംപ് അധികാരത്തില്‍ വന്നതിന് ശേഷം കുടിയേറ്റം, നികുതി, മറ്റ് ട്രംപ് നയങ്ങള്‍ എന്നിവ രാജ്യത്തിന്റെ സമ്പദ്‌വ്യവസ്ഥയെയും പണപ്പെരുപ്പത്തെയും എങ്ങനെ സ്വാധീനിക്കുന്നുവെന്ന് വിലയിരുത്തുന്നതിന് വേണ്ടിയാണ് ഡിസംബര്‍ മുതല്‍ ഫെഡ് റിസര്‍വ് നിരരക്കുകളില്‍ മാറ്റം വരുത്താതിരുന്നത്. ഇതിനെ ചൊല്ലി ട്രംപ് ജെറോം പവലിനെ അധിക്ഷേപിക്കുകയും സമ്മര്‍ദ്ദപ്പെടുത്തുകയും ചെയ്തിരുന്നു. എന്തായാലും അമേരിക്കയെയും ഡോളറിനെയും പഴയ പ്രതാപത്തില്‍ എത്തിക്കും എന്ന പ്രചാരണവുമായി യുഎസ് തെരഞ്ഞെടുപ്പില്‍ മത്സരിക്കുകയും യുഎസ് പ്രസിഡന്‍റായി അധികാരത്തില്‍ എത്തുകയും ചെയ്ത ട്രംപിന്റെ കരങ്ങള്‍ക്ക് ശക്തികൂട്ടുന്ന നടപടിയാണ് ഇത്.
