തൃശൂര്‍ : പീച്ചി പൊലീസ് സ്റ്റേഷന്‍ മര്‍ദനത്തില്‍ ആരോപണവിധേയനായ എസ്എച്ച്ഒ പി എം രതീഷിനെ സസ്‌പെന്‍ഡ് ചെയ്തു. ദക്ഷിണ മേഖല ഐജിയാണ് നടപടി സ്വീകരിച്ചത്.
ഇപ്പോള്‍ കടവന്ത്ര എസ്എച്ച്ഒയാണ് രതീഷ്. നേരത്തെ കസ്റ്റഡി മര്‍ദനവുമായി ബന്ധപ്പെട്ട് ഉത്തര മേഖല ഐജി ദക്ഷിണ മേഖല ഐജിയ്‌ക്ക് റിപ്പോര്‍ട്ട് നല്‍കിയെങ്കിലും നടപടിയെടുക്കാതിരുന്നത് വിവാദമായിരുന്നു
2023 മേയ് 24ന് പട്ടിക്കാട് ലാലീസ് ഹോട്ടല്‍ മാനേജര്‍ മാനേജര്‍ കെപി ഔസേപ്പിനെയും മകനെയുമായിരുന്നു അന്നത്തെ എസ്എച്ച്ഒയായിരുന്ന രതീഷ് മര്‍ദിച്ചത്. സംഭവത്തിന്റെ സിസിടിവി ദൃശ്യങ്ങള്‍ അടുത്ത കാലത്താണ് പുറത്തുവന്നത്. ഹോട്ടലില്‍ ഭക്ഷണം കഴിക്കാനെത്തിയ ആള്‍ നല്‍കിയ വ്യാജ പരാതിക്ക് പിന്നാലെയാണ് ഇവരെ സ്റ്റേഷനിലെത്തിച്ച് മര്‍ദ്ദിച്ചത്.
ആരോപണവിധേയനായ രതീഷിന് പിന്നീട് സ്ഥാനക്കയറ്റം ലഭിച്ച് കടവന്ത്ര പൊലീസ് സ്റ്റേഷനില്‍ എസ്എച്ചഒയായി . പീച്ചി പൊലീസ് സ്റ്റേഷനിലെ മര്‍ദനവുമായി ബന്ധപ്പെട്ട റിപ്പോര്‍ട്ട് ദക്ഷിണ മേഖല ഐജിയുടെ ഓഫീസില്‍ ഏഴ് മാസത്തോളമാണ് കെട്ടിക്കിടന്നത്.
സംസ്ഥാന വിവരാവകാശ കമ്മിഷന്‍ മുഖേന പൊലീസ് സ്റ്റേഷനിലെ ദൃശ്യങ്ങള്‍ ലഭിക്കുന്നതിന് ഔസേപ്പ് അപേക്ഷിച്ചു. ഒടുവില്‍ മനുഷ്യാവകാശകമ്മിഷന്‍ ഇടപെട്ടതോടെയാണ് ദൃശ്യങ്ങള്‍ നല്‍കാന്‍ പൊലീസ് തയാറായത്. ഇതോടെയാണ് സ്റ്റേഷനില്‍ എത്തിച്ച് ഔസേപ്പിനെയും മകനെയും ക്രൂരമായി മര്‍ദിക്കുന്ന ദൃശ്യങ്ങള്‍ പുറത്തുവന്നത്.
