വടക്കു കിഴക്കന് സംസ്ഥാനങ്ങള് നൂറ്റാണ്ടുകളായി ഭാരതത്തിന്റെ അവിഭാജ്യ ഘടകമാണെങ്കിലും വികസനപരമായി അങ്ങനെ ആയിരുന്നില്ല. സ്വാതന്ത്ര്യത്തിനുശേഷം ആറുപതിറ്റാണ്ട് കാലം കോണ്ഗ്രസ് രാജ്യവും സംസ്ഥാനങ്ങളും ഭരിച്ചതാണ് ഈ വികസന രാഹിത്യത്തിന് പ്രധാന കാരണം. 2014 ല് ബിജെപി രാജ്യത്ത് അധികാരത്തില് വരികയും, നരേന്ദ്ര മോദി പ്രധാനമന്ത്രിയാവുകയും ചെയ്തതോടെ കോണ്ഗ്രസിന്റെ അധികാര കുത്തക തകര്ന്നു. രാജ്യത്ത് വികസനത്തിന്റെ പുതിയൊരു യുഗം പിറക്കുകയും ചെയ്തു. വടക്കു കിഴക്കന് സംസ്ഥാനങ്ങള് ഈ വികസന മുന്നേറ്റത്തിന്റെ ഗുണഭോക്താക്കളായി മാറി. മിസോറാമിലെ ബൈറാബി-സൈരാങ് റെയില് പാത പ്രധാനമന്ത്രി മോദി രാഷ്ട്രത്തിന് സമര്പ്പിച്ചതോടെ ഈ കൊച്ചു സംസ്ഥാനം രാജ്യത്തിന്റെ റെയില് ഭൂപടത്തില് സ്ഥാനം പിടിച്ചിരിക്കുകയാണ്. രാജ്യത്തിനും മിസോറാമിലെ ജനങ്ങള്ക്കും ചരിത്രപരമായ ദിനമാണിതെന്ന് പ്രധാനമന്ത്രി പറഞ്ഞത് അക്ഷരാര്ത്ഥത്തില് ശരിയാണ്.
വടക്കുകിഴക്കന് സംസ്ഥാനങ്ങള്ക്ക് തന്ത്രപ്രധാനമായ സ്ഥാനമുണ്ട്. ഭൂട്ടാന്, നേപ്പാള് മുതലായ രാജ്യങ്ങളിലേക്കും, ആസിയാന് രാഷ്ട്രങ്ങളുടെ വിപണികള്ക്കും എളുപ്പത്തിലുള്ള പ്രവേശന സൗകര്യം ഇതുവഴിയുണ്ട്. നരേന്ദ്ര മോദി സര്ക്കാരിന്റെ ‘ആക്ട് ഈസ്റ്റ് ‘ നയത്തിന്റെ അവിഭാജ്യഘടകമാണ് വടക്കുകിഴക്കന് സംസ്ഥാനങ്ങള്.
പ്രകൃതി സമ്പത്ത് സമൃദ്ധമായ ഈ പ്രദേശത്ത് വന് ധാതു നിക്ഷേപങ്ങളുമുണ്ട്. വ്യാവസായിക ആവശ്യങ്ങള്ക്കുള്ള വിഭവങ്ങളും ധാരാളം.
അറുപത് ശതമാനത്തിലേറെയും വനങ്ങളാണ്. സമൃദ്ധമായ പ്രകൃതി വിഭവങ്ങളും വിശാലമായ ജൈവ വൈവിധ്യവും കൊണ്ട് സമ്പന്നമായ ഈ പ്രദേശം വിനോദസഞ്ചാരികള്ക്ക് പ്രിയപ്പെട്ടതുമാണ്. സാംസ്കാരിക വൈവിധ്യങ്ങളുടെ കലവറയാണ്. നിക്ഷേപകര്ക്ക് ഇവിടുത്തെ ജനങ്ങളുടെ സമ്പന്നമായ സാംസ്കാരിക പൈതൃകം ലോകത്തിനു മുന്നില് പ്രദര്ശിപ്പിക്കാനുള്ള വിശാലമായ സാധ്യതകളുണ്ട്. ഈ പ്രദേശത്തെ വ്യാപാര വളര്ച്ചയെ പിന്തുണയ്ക്കുന്നതിനായി മോദി സര്ക്കാര് ധാരാളം ആനുകൂല്യങ്ങള് നല്കുന്നുണ്ട്.
അനേകം കേന്ദ്രസംസ്ഥാന പദ്ധതികള് വഴി വ്യാവസായിക സാങ്കേതിക പാര്ക്കുകള്, ലോജിസ്റ്റിക്സ് ഹബ്ബുകള്, അടിസ്ഥാന സൗകര്യങ്ങള് എന്നിവ വഴി ഈ മേഖലയില് അതിവേഗമാണ് മാറ്റങ്ങള് സംഭവിക്കുന്നത്. രാജ്യം വികസിക്കണം എന്നു മാത്രമല്ല, ആ വികസനം അസന്തുലിതമാവരുതെന്നും നരേന്ദ്ര മോദി സര്ക്കാരിന് നിര്ബന്ധമുണ്ട്. കോണ്ഗ്രസ് സര്ക്കാര് കേന്ദ്രത്തില് അധികാരത്തില് ഇരുന്നപ്പോള് വടക്കുകിഴക്കന് സംസ്ഥാനങ്ങളെ നിരന്തരം അവഗണിക്കുകയായിരുന്നു. ഇവിടുത്തെ ജനങ്ങളുടെ ജീവിതനിലവാരം ഉയര്ത്താന് ആത്മാര്ത്ഥമായി യാതൊന്നും ചെയ്തില്ല. സ്ഥാപിത താല്പര്യക്കാരെ പിന്തുണയ്ക്കുകയാണ് കോണ്ഗ്രസ് ചെയ്തത്. ഇത് വിഘടന വാദത്തിന് വളംവയ്ക്കുകയും കലാപങ്ങള്ക്ക് വഴിമരുന്നിടുകയും ചെയ്തു. ഇതിന്റെ ദുരന്തഫലങ്ങളില് നിന്ന് ഇപ്പോഴും ഈ സംസ്ഥാനങ്ങള്ക്ക് മോചനം ലഭിച്ചിട്ടില്ല. ഇതിന് ഉദാഹരണമാണ് മണിപ്പൂരിലെ അക്രമസംഭവങ്ങള്. ജനങ്ങളെ വികസനത്തിന്റെ മുഖ്യധാരയിലേക്ക് കൊണ്ടുവന്നും, സാംസ്കാരിക ധാരകളെ ശക്തിപ്പെടുത്തിയും ദേശീയോദ്ഗ്രഥനം സാധ്യമാക്കുകയാണ് മോദി സര്ക്കാര് ചെയ്യുന്നത്. സംഗീതത്തിന്റെ വിശ്വചക്രവാളം തൊട്ട അസമിന്റെ പ്രിയഗായകന് ഭൂപെന് ഹസാരികയെ നൂറാം ജന്മദിനത്തില് പ്രധാനമന്ത്രി അനുസ്മരിച്ചത് ഇതിന്റെ ഭാഗമാണ്. ഈ ആത്മബന്ധത്തിന്റെ ഏറ്റവും പുതിയ ഉദാഹരണമാണ് മിസോറാമിലും കണ്ടത്. സങ്കുചിത രാഷ്ട്രീയത്തിനപ്പുറം മൂര്ത്തമായ പ്രവര്ത്തനങ്ങള് കാഴ്ചവയ്ക്കുന്നതിലൂടെ മോദി അഷ്ടലക്ഷ്മിമാര് എന്നു വിളിപ്പേരുള്ള വടക്കു കിഴക്കന് സംസ്ഥാനങ്ങളുടെ തിളക്കം വര്ദ്ധിപ്പിക്കുകയാണ്.
