കാത്മണ്ഡു : നേപ്പാളിലെ രാഷ്‌ട്രീയ അനിശ്ചിതത്വങ്ങള്‍ക്ക് വിരാമമിട്ട് സുശീല കര്‍ക്കി ഇടക്കാല പ്രധാനമന്ത്രിയായി സത്യപ്രതിജ്ഞ ചെയ്തു.നേപ്പാളിലെ ആദ്യ വനിത പ്രധാനമന്ത്രിയാണ് ഇവര്‍.
സുപ്രീം കോടതി മുന്‍ ചീഫ് ജസ്റ്റിസ് കൂടിയാണ് സുശീല കര്‍ക്കി. നേപ്പാള്‍ വൈദ്യുതി അതോറിറ്റിയുടെ മുന്‍ എംഡി കുല്‍മാന്‍ ഗിസിംഗിനെ പ്രധാനമന്ത്രി ആക്കണമെന്ന് ഒരു വിഭാഗം പ്രക്ഷോഭകര്‍ ആവശ്യപ്പെട്ടിരുന്നു.
സുശീല കര്‍ക്കി താല്‍ക്കാലിക ഭരണ ചുമതല ഏറ്റെടുക്കാന്‍ ധാരണയില്‍ എത്തിയതിന് പിന്നാലെയാണ് നേപ്പാള്‍ വൈദ്യുതി അതോറിറ്റിയുടെ മുന്‍ എംഡി കുല്‍മാന്‍ ഗിസിംഗിനെ ഇടക്കാല പ്രധാനമന്ത്രി ആക്കണമെന്ന ആവശ്യമുന്നയിച്ച് ഒരു വിഭാഗം പ്രക്ഷോഭകര്‍ രംഗത്ത് വന്നത്. സൈനിക മേധാവി പ്രക്ഷോഭകരുമായി പല വട്ടം ചര്‍ച്ചകള്‍ നടത്തി.
പ്രക്ഷോഭത്തില്‍ 51 പേര് മരിച്ചതായി നേപ്പാള്‍ ആരോഗ്യ മന്ത്രാലയം അറിയിച്ചു. മരിച്ച 25 പേരെ തിരിച്ചറിഞ്ഞു. എന്നാല്‍ പേര് വിവരങ്ങള്‍ പുറത്ത് വിട്ടിട്ടില്ല. തെക്കുകിഴക്കന്‍ കാത്മണ്ഡുവിലെ ജയിലില്‍ നിന്നും ചാടിയ തടവുകാര്‍ക്ക് നേരെ സൈന്യം നടത്തിയ വെടിവെപ്പില്‍ രണ്ട് പേര് മരിച്ചു. 12 പേര്‍ക്ക് പരിക്കേറ്റു.
സംഘര്‍ഷത്തിനിടെ ജയില്‍ ചാടിയ 15000 ത്തോളം പേരില്‍ 200 പേരെ പിടികൂടി.ഇതില്‍ 60 ഓളം പേരെ ഇന്ത്യന്‍ അതിര്‍ത്തികളില്‍ നിന്നാണ് പിടികൂടിയത്. നേപ്പാളില്‍ കുടുങ്ങിയ ഇന്ത്യാക്കാരെ തിരികെ എത്തിക്കാന്‍ ഇന്ന് എയര്‍ ഇന്ത്യയും ഇന്‍ഡിഗോയും അധിക വിമാന സര്‍വീസുകള്‍ നടത്തി.
സമൂഹമാധ്യമ ആപ്പുകള്‍ക്കുമേല്‍ നിരോധനമേര്‍പ്പെടുത്തിയതിനെ തുടര്‍ന്ന് ആരംഭിച്ച ജെന്‍സി പ്രതിഷേധം അഴിമതിയുള്‍പ്പെടെയുള്ള വിഷയങ്ങള്‍ ഉയര്‍ത്തി ജനങ്ങള്‍ ഏറ്റെടുത്തതോടെ നേപ്പാള്‍ സംഘര്‍ഷഭരിതമായി.
